Një gjykatë gjermane ka marrë vendim që platforma Meta të jetë përgjegjëse për reklama të rreme të postuara nga palë të treta në platformat Instagram dhe Facebook, dhe urdhëroi gjigantin amerikan të teknologjisë të heqë këtë përmbajtje dhe të paguajë dëmshpërblime, tha gjykata të enjten.
Padia u ngrit nga operatori i një portali financiar gjerman dhe themeluesi i tij, logoja dhe imazhi i të cilit u përdorën pa pëlqimin e tyre në postime që rekomandonin investime me qëllim të dyshuar mashtrues, raportoi Reuters të enjten.
Sipas gjykatës, ky operator raportoi gati 260 shkelje te Metas vetëm në gusht të vitit 2024, megjithatë Meta mori deri në 62 ditë për të hequr disa përmbajtje.
Ajo vendosi se Meta nuk mund të mbështetej në mbrojtjen e mungesës së njohurive sipas Ligjit për Shërbimet Digjitale, sepse ndryshe nga transmetimet kronologjike, ajo ushtron kontroll mbi përmbajtjen përmes algoritmeve dhe praktikave të reklamimit.
Gjykata iu referua një precedenti të vendosur nga një vendim i qershorit nga Gjykata Evropiane e Drejtësisë.
"Ne nuk pajtohemi me këtë vendim dhe po shqyrtojmë hapat e ardhshëm," tha një zëdhënës i Metas në një deklaratë, duke shtuar se kompania kishte ndërmarrë veprime të rëndësishme, përfshirë masa proaktive për zbulim dhe heqjen e përmbajtjes së raportuar.
Vendimi ende nuk është përfundimtar dhe mund të sfidohet me apel.