Bashkëthemeluesi i Microsoftit, Bill Gates, ka paralajmëruar për rreziqe potencialisht katastrofike nga inteligjenca artificiale, duke thënë se teknologjia mund të shkaktojë ngjarje që do të çonin në vdekjen e deri në një miliard njerëzve nëse keqpërdoret dhe mbetet pa kontroll.
Në një intervistë për emisionin “Meet the Press” të NBC-së, Gates tha se fuqia e inteligjencës artificiale është e tillë që mund të përdoret për të shkaktuar pasoja në shkallë jashtëzakonisht të madhe.
“AI është sigurisht mjaftueshëm e fuqishme për të nxitur ngjarje që shkaktojnë një miliard vdekje”, është shprehur Gates.
Ai paralajmëroi për mundësinë që persona me qëllime të këqija të përdorin sistemet e avancuara të AI-së për të krijuar mjete të rrezikshme.
Sipas Gates, një nga sfidat kryesore është dallimi mes përdorimeve me qëllime të mira dhe atyre keqdashëse. Ai solli si shembull përdorimin e AI-së për zhvillimin e një ilaçi të ri kundër një sëmundjeje, përballë përdorimit të së njëjtës teknologji për krijimin e mjeteve të bioterrorizmit.
Gates u bëri thirrje ligjvënësve që të përfshihen në vendosjen e rregullave dhe mekanizmave të sigurisë për inteligjencën artificiale.
Paralajmërimet e tij u dhanë në një periudhë kur shqetësimet për zhvillimin e AI-së janë shtuar ndjeshëm.
Ish-kërkuesi i Anthropic, Jacob Coxon, ka paralajmëruar më parë për mundësinë e një katastrofe të shkaktuar nga inteligjenca artificiale.
Ndërkohë, raportimet për aftësitë e disa sistemeve të AI-së për të kryer sulme kibernetike kanë nxitur diskutime të reja mbi nevojën për mbikëqyrje dhe rregullim të teknologjisë.
Debati tashmë përqendrohet te mënyra se si mund të shfrytëzohet potenciali i AI-së, duke vendosur njëkohësisht masa që synojnë të kufizojnë keqpërdorimin e saj.