Aksionet e kompanive të inteligjencës artificiale kanë pësuar rënie të ndjeshme në tregjet globale të hënën, pasi drejtues të kompanive më të mëdha të industrisë kanë paralajmëruar për rreziqet që mund të sjellë zhvillimi tepër i shpejtë i teknologjisë.
Paralajmërimet kanë shtuar shqetësimet e investitorëve për miliarda dollarët që po derdhen në sektorin e inteligjencës artificiale, investime që kanë ndihmuar në shtyrjen e tregjeve globale drejt niveleve rekord.
Dario Amodei, drejtori ekzekutiv i Anthropic, ka bërë thirrje që kompanitë e AI të ngadalësojnë ritmin e zhvillimit të modeleve të tyre, duke iu referuar shqetësimeve në rritje për keqpërdorimin e inteligjencës artificiale.
Qëndrimin e Amodeit e kanë mbështetur edhe Elon Musk, drejtues i xAI, dhe Sam Altman, drejtor ekzekutiv i OpenAI.
Reagimi i tregjeve ka qenë i menjëhershëm. Kontratat e së ardhmes që ndjekin Nasdaqun në Wall Street ranë me rreth 1.9%, ndërsa kompanitë e çipave, të cilat kanë përfituar ndjeshëm nga bumi i inteligjencës artificiale, pësuan ndër rëniet më të mëdha.
Aksionet e Nvidia ranë rreth 3%, ndërsa SpaceX i Elon Musk ra me 2.6% e gjigantët e teknologjisë Meta dhe Amazon humbën më shumë se 1.4% secila.
Rënie u regjistruan edhe në Evropë. Indeksi i kompanive teknologjike evropiane ra rreth 2.5%, i ndikuar veçanërisht nga rënia e kompanisë së pajisjeve për prodhimin e çipave ASML, aksionet e së cilës ranë me 5.8%.
Në Azi, SoftBank, një prej investitorëve të rëndësishëm të OpenAI-it, ra deri në 13.2%. Taiwan Semiconductor Manufacturing Company humbi rreth 1.2%, ndërsa SK Hynix ra me 6.3%.
Shqetësimet nuk lidhen vetëm me ritmin e zhvillimit teknologjik. Investitorët po përballen edhe me pyetjen se çfarë do të ndodhë me infrastrukturën e kushtueshme të ndërtuar për të mbështetur zgjerimin e inteligjencës artificiale, nëse kërkesa për kapacitete kompjuterike dhe të ardhurat nuk rriten sipas pritjeve.
Ndërkohë, Morgan Stanley ka parashikuar se shpenzimet globale për inteligjencën artificiale mund të tejkalojnë 1.2 trilionë dollarë deri në vitin 2027.
Sam Altman ka deklaruar se rreziqet që inteligjenca artificiale mund të paraqesë për ekzistencën njerëzore janë “të papranueshme”.
Në Shtetet e Bashkuara, disa ligjvënës kanë kërkuar rregulla të reja për zhvillimin e AI. Megjithatë, presidenti Donald Trump ka kritikuar skeptikët e teknologjisë, duke argumentuar se Shtetet e Bashkuara duhet të ruajnë lidershipin global në këtë industri.
Ndërkohë, Shtetet e Bashkuara dhe Kina pritet të zhvillojnë këtë muaj bisedime për sigurinë e inteligjencës artificiale, në kuadër të diskutimeve më të gjera dypalëshe.