-
Превела: Вита Абраши-Кајтази
- 8. септембар 2026. 10:15
- Учешће у:
Prindërit e Celeste Rivas Hernandez, e cila do të mbushte 16 vjeç të hënën, kanë kërkuar që prokuroria e Los Angelesit të ndjekë dënimin me vdekje nëse këngëtari amerikan D4vd shpallet fajtor për vrasjen e vajzës së tyre, ka shkruar Тхе Роллинг Стоне.
Në një deklaratë të rrallë publike, familja iu drejtua prokurorit të qarkut të Los Angelesit, Nathan Hochman, duke thënë se një dënim i tillë do të ishte i përshtatshëm për personin që, sipas akuzave, u shkaktoi dhimbje vajzës dhe familjes së tyre.
“Nëse dënimi me vdekje do të vihej në zbatim, do të ishte i përsosur për një qenie njerëzore të tillë, pa ndjenja, bosh nga brenda dhe pa ndërgjegje, që i shkaktoi vetëm dhimbje vajzës sonë, familjes sonë dhe gjithë botës që e mbështet vajzën tonë të çmuar”, thuhet ne deklaratën e familjes.
Megjithatë, ata pranuan se vendimi nuk është në duart e tyre.
“Kjo nuk është në dorën tonë, por në duart e Zotit dhe të sistemit të drejtësisë në Kaliforni”, thuhet tutje në deklaratë.
D4vd, emri i vërtetë i të cilit është David Burke, është deklaruar i pafajshëm ndaj akuzave se ka abuzuar seksualisht me Celesten, atëherë 14 vjeç, dhe më pas e ka vrarë, copëtuar trupin dhe fshehur mbetjet e saj në pjesën e përparme të makinës së tij Tesla.
Çështja e dënimit me vdekje mbetet ende e hapur. Kalifornia nuk ka kryer ekzekutim që nga viti 2006, ndërsa guvernatori Gavin Newsom ka vendosur një moratorium për ekzekutimet në vitin 2019. Megjithatë, prokurori Nathan Hochman ka hapur mundësinë që dënimi me vdekje të kërkohet në raste jashtëzakonisht të rënda.
“Politika e mëparshme që ndalonte kategorikisht prokurorët të kërkonin dënimin me vdekje është shfuqizuar. Në vend të saj, dënimi me vdekje do të shqyrtohet vetëm pas një analize të plotë dhe gjithëpërfshirëse dhe vetëm në raste jashtëzakonisht të rralla”, ka thënë ai.
Hetimet dhe procesi gjyqësor ndaj Burket vazhdojnë.