-
Од:
ББЦ
- 25. октобар 2026. 09:17
- Учешће у:
Meghan, dukesha e Sussexit, ndërpreu kontaktet me të atin vitin e kaluar, duke i thënë se ajo dhe autoritetet ishin në dijeni të akuzave se ai kishte abuzuar me vajza të mitura, mëson BBC.
Burime pranë dukeshës bëjnë të ditur se Meghan e paralajmëroi të atin, Thomas Markle, përmes një letre se ai nuk do t’i takonte kurrë nipërit e tij.
Letra dyshohet se iu dërgua Markle, 82 vjeç, ndërsa ai ndodhej në spital në Filipine, pasi i ishte amputuar këmba.
Sipas raportimeve, në ish-shtëpinë e tij në Filipine janë gjetur imazhe që dyshohet se përmbajnë materiale të abuzimit seksual me fëmijë dhe që pretendohet se i përkisnin Markle. Në vitin 2019, policia britanike e kishte informuar Meghan për akuzat ndaj të atit. Markle, i cili jeton në SHBA, i mohon të gjitha akuzat.
Meghan nuk ka pasur marrëdhënie me të atin që nga viti 2018, kur ai u tërhoq nga dasma mbretërore e së bijës, duke përmendur probleme shëndetësore.
Letra e dërguar në vitin 2025 duket se shënon fundin e marrëdhënies së trazuar mes babait dhe vajzës.
Sipas informacioneve, në letër Meghan i bëri të qartë të atit se ai nuk do t’i takonte kurrë fëmijët e saj, Archie dhe Lilibet, si dhe se ajo nuk do të kontaktonte më me të. Ajo gjithashtu i kishte thënë se autoritetet ishin në dijeni të akuzave ndaj tij.
Vëllai i Meghanit, Thomas Markle Jr., pretendoi të premten në një intervistë për gazetën “The Sun” se kishte gjetur një sasi të madhe imazhesh që i përkisnin të atit në ish-shtëpinë e tij në Filipine.
Ai thuhet se i ka njoftuar autoritetet se mes materialeve kishte zbuluar video dhe fotografi që paraqisnin abuzim me fëmijë. Po ashtu, ai dyshohet se e ka kontaktuar Byronë Federale të Hetimeve të SHBA-së (FBI) për këtë çështje në korrik.
FBI-ja ka konfirmuar se është në dijeni të akuzave.
Të dielën, Markle Jr., 60 vjeç, i kërkoi falje Meghanit në një intervistë për “The Sun”, duke pranuar se fillimisht kishte mbështetur të atin gjatë konfliktit të gjatë familjar.
“Tani e di se për nëntë vitet e fundit kam mbrojtur personin e gabuar”, deklaroi ai.
Ndërkohë, autoritetet në Filipine kanë konfirmuar se po hetojnë akuzat ndaj Thomas Markle. Të premten, zyrtarë i thanë BBC-së se çështja po shqyrtohet nga grupi i posaçëm kundër trafikimit të qenieve njerëzore dhe shfrytëzimit seksual të fëmijëve.
Ministri i Brendshëm i Filipineve, Jonvic Remulla, deklaroi veçmas se policia kombëtare kishte sekuestruar kompjuterin e Thomas Markle dhe do të kryente një ekspertizë digjitale.
Ndërkohë, Thomas Markle ka dhënë një intervistë për gazetën “Mail on Sunday”, ku ka pranuar se gjatë vizitave të mëparshme në Filipine kishte paguar për marrëdhënie seksuale. Megjithatë, ai mohon të ketë pasur marrëdhënie seksuale me vajza të mitura ose të ketë poseduar ndonjëherë materiale që përmbajnë abuzim seksual me fëmijë.