Са пет медаља, косовски џудо одржава врхунски стандард

Kosova e ka rritur ndjeshëm numrin e sportistëve në Lojërat Mesdhetare. Në Oran të Algjerisë në vitin 2022 ishin 38 sportistë kosovarë. Në Taranto të Italisë janë plot 163 sportistë nga Kosova. 

Rezultatet e deritashme kanë dëshmuar se edhe niveli mesdhetar është i papërballueshëm për shumicën e sportistëve në vend. Jo edhe për xhudistët e kryemjeshtrit Driton Kuka. 

Derisa pak prej sportistëve apo ekipeve të Kosovës kanë shënuar ndonjë fitore, xhudistët i kanë fituar plot pesë medalje. Dhe kështu kanë mbajtur standardin që Kuka e ka vendosur shumë vjet më parë.

Garat e xhudos përfunduan të shtunën, ndërsa Kosova, ashtu si pritej, ishte e suksesshme. Medalje të argjendtë fitoi Laura Fazliu, kurse medalje të bronzta fituan Akil Gjakova, Shpati Zekaj, Flaka Loxha e Fatjona Kasapi.

Në të gjitha sportet e tjera Kosova e ka vetëm një medalje – të artën e boksieres Donjeta Sadiku.

Ka shumë faktorë që e bëjnë shumë të rëndësishëm bilancin e xhudos kosovare në “Taranto 2026”. Në fakt ekipi i kryemjeshtrit Kuka i takon nivelit dukshëm më të lartë se ai i Lojërave Mesdhetare. Nxënësit e Kukës fitojnë rregullisht medalje në Kampionate Botërore e Evropiane, por edhe në garat e tjera të xhudos si Masters, Grand Slam e Grand Prix. Në të gjitha këto gara konkurrenca është më e fortë se në Lojëra Mesdhetare. 

Megjithatë për ekipin e xhudos rëndësi ka edhe kjo ngjarje shumësportëshe. Dhe xhudistët e respektojnë maksimalisht, ndër të tjera duke sjellë medalje për vendin.

Të premten e të shtunën u fituan medalje të shumta, ndonëse mungoi aduti kryesor, sportistja më e mirë në vend, Distria Krasniqi. Pos kësaj ekipi i xhudos është në proces të gjatë e sfidues të ndërrimit të gjeneratës. Disa prej xhudistëve janë duke u kthyer në formën më të mirë pas lëndimeve jo të lehta. Gjitha këto i bëjnë shumë të rëndësishme medaljet e xhudos në Taranto.

“Jam i kënaqur me medaljet. Mungesa e Distria Krasniqit solli pak nervozënë ekip, sidomos në fillim të garës. Por pesë medalje e dy vende të pesta janë rezultat i shkëlqyeshëm. Personalisht mendoj se secili prej tyre ka pasur edhe më shumë për të treguar”, ka thënë për KOHËN trajneri i Kosovës në xhudo, Driton Kuka. 

Ai e di që ky nuk është maksimumi i ekipit që drejton. Medaljet në ngjarjet më të mëdha, duke përfshirë tri edicionet e fundit të Lojërave Olimpike, e dëshojmë këtë. 

Shtatë xhudistë përfaqësuan Kosovën në Lojëra Mesdhetare. Në vend të pestë përfunduan Dardan Cena e Erza Muminoviq.

“Gëzim i veçantë për mua janë medaljet e meshkujve, të fituara në një konkurrencë të fortë. Akili e Shpati morën medalje, kurse Dardani shkëlqeu, ndonëse mbeti i pesti”, ka theksuar Kuka.

Kuka i ka pritur dy-tri medalje, por ekipi i tij i fitoi plot pesë.

“Ekipi është rritur, kjo është e qartë. Rritja është në të gjitha moshat. Dhe jemi në kërkim të ndërtimit të profilit të tri kampioneve olimpike. Kjo është sfida – do të shohim se a do të arrijmë të kemi emra të tjerë”.

Dy prej kampioneve olimpike, Majlinda Kelmendi e Nora Gjakova, tashmë janë duke punuar si trajnere. Kampionia tjetër, Distria Krasniqi, është në periudhë jashtë garave dhe ka përkrahur nga tribuna shokët e ekipit në Taranto.

E arta olimpike është standard i jashtëzakonshëm edhe për vende me sport dukshëm më të zhvilluar se Kosova. Por trajneri Kuka tashmë i ka tri të arta olimpike me nxënësit e tij, e po ashtu një të argjendtë me Distrinë dhe një të bronztë me Laurën.

Lojërat Mesdhetare nuk i afrohen për nga niveli Lojërave Olimpike. Por për Kosovën është ngjarje shumë sfiduese. Pa xhudon e pa Donjetën, Lojërat e Tarantos, të paktën për atë që është shfaqur deri më tani, do të rrezikonin të ishin dështim.

Por janë sukses.  Sukses që e ka edhe çmimin – fshehjen e shumë dështimeve në disiplinat tjera. Fshehjen e humbjeve me rezultat maksimal dhe përfundimin në vendet e fundit, me gjithë konkurrencën jo shumë të madhe.

“Shtatë garues, pesë medalje, dy vende të pesta. Të gjithë ishin në garë për medalje. Kjo flet shumë për nivelin, vazhdimësinë dhe rritjen e ekipit”, ka shtuar Driton Kuka.

Kosova për herë të tretë po paraqitet në Lojëra Mesdhetare. Në pjesëmarrjen e parë, në Tarragona të Spanjës në vitin 2018, ishin 40 sportistë dhe u fituan katër medalje, të gjitha në xhudo. Distria Krasnqi, Nora Gjakova dhe Akil Gjakova fituan të arta, ndërsa Loriana Kuka të argjendtë. Në Oran në vitin 2022 u fituan gjashtë medalje, prej tyre pesë nga xhudoja. Të arta fituan Distria Krasniqi, Laura Fazliu dhe Loriana Kuka, ndërsa të bronzta Flaka Loxha e Akil Gjakova. Të bronztë fitoi edhe boksieri Shpëtim Bajoku. 

Në Taranto është barazuar shifra e gjashtë medaljeve dhe pesë prej tyre nga xhudoja. Shpresohet që kjo shifër të rritet deri në fund të Lojërave.