Mediumet italiane kanë vlerësuar aftësitë individuale të Edon Zhegrovës, por kanë vënë në pah problemet e Juventusit në fazën ofensive.
Zhegrova po shihet si një prej lojtarëve që mund t’i japë më shumë kreativitet sulmit të Juventusit, në një periudhë kur skuadra italiane po has vështirësi në krijimin e rasteve dhe konkretizimin e tyre.
Në një analizë të publikuar nga “Goal”, gazetari Simone Eterno kritikon lojën ofensive të Juventusit, duke theksuar se skuadra nuk mund të mbështetet vetëm te aftësitë individuale të futbollistit kosovar për t’i zgjidhur problemet në sulm.
Sipas analizës, Zhegrova është ndër lojtarët që mund ta ndryshojnë ritmin e lojës përmes driblimeve dhe depërtimeve individuale. Paraqitjet e tij kanë sjellë më shumë gjallëri në fazën ofensive të skuadrës, veçanërisht në situatat kur Juventusi ka vështirësi të depërtojë përmes lojës së organizuar.
Për Zhegrovën, kjo analizë paraqet një vlerësim të aftësive të tij teknike dhe potencialit për të ndikuar në lojën e Juventusit.