-
Од:
Ендрит Маколли
- 8. септембар 2026. 14:59
- Учешће у:
Statistikat e fillimit të edicionit janë premtuese: pesë ndeshje, tri gola, një asistim.
Sulmuesi i Kosovës, Baton Zabërgja, aktualisht është në mesin e pesë golashënuesve më të mirë të kampionatit të Ukrainës.
Forma e treguar në pesë ndeshjet e para e bënë Zabërgjën optimist për vazhdimin e kampionatit.
Sulmuesi i skuadrës Metalist Kharkiv ka regjistruar edhe një gol dhe dy asistime në garë për Kupën e Ukrainës.
“Statistikat flasin vetë. Mendoj që e kam nisur mirë këtë sezon dhe shpresoj të vazhdoj kështu. Synimi është që të paraqitem sa më mirë dhe të vazhdoj të shënoj gola”, ka thënë Zabërgja.
Ai pjesë e Metalist Kharkivit është nga vera e vitit të kaluar kur u transferua nga Dinamo e Tiranës për 800 mijë euro. Sulmuesi kosovar edicionin e kaluar në 30 ndeshjet e zhvilluara në të gjitha garat kontribuoi me tetë gola dhe tri asistime.
Edhe pse fillimi nuk ka qenë i lehtë, Zabërgja shprehet se tashmë është ambientuar me ligën dhe ndihet më i përgatitur për sfidat që e presin në ndeshjet e ardhshme.
“Fillimi ka qenë paksa i vështirë, normalisht, mirëpo besoj që tash jam i gatshëm dhe kam njohuri të mjaftueshme për ligën ukrainase”.
Liga ukrainase zhvillohet në kushte të jashtëzakonshme. Për shkak të sulmeve ruse, shumë ndeshje ndërpriten nga sirenat e alarmit. Por futbolli vazhdon të luhet në Ukrainë, ndërkohë që numri i lojtarëve të huaj është i madh. Në këtë vend janë edhe disa reprezentues të Kosovës.
Zabërgja është pjesë e rëndësishme e përfaqësueses së Kosovës. Ka gjashtë ndeshje të luajtura me “Dardanët”.
Kosova këtë muaj i luan ndeshjet e para të edicionit të ri të Ligës së Kombeve të UEFA-s. Për herë të parë do të luajë në Ligën B, që është niveli i dytë.
“Dardanët” janë në Grupin 3 së bashku me Austrinë, Izraelin dhe Irlandën.
“Ende nuk kam pranuar ftesë, mirëpo jam gjithmonë i gatshëm dhe shpresoj të bëjmë maksimumin nga këto ndeshje”, u shpreh Zabërgja.
Zabërgja ka të kaluar edhe te disa skuadra kosovare si Vushtrria, Drenica dhe Gjilani.
Metalist Kharkivi është i katërti në tabelë me nëntë pikë. Vlerësohet në garë për kreun e tabelës.