Неизвесност око ситуације Фисника Асланија

Kanë kaluar tre javë që kur lajmi për transferimin e dështuar të Fisnik Asllanit te Leipzigi u përhap në kampin stërvitor të Hoffenheimit në Austri. 

Drejtuesit e Hoffenheimit u përpoqën menjëherë ta minimizonin rëndësinë e situatës dhe “shqetësimet mjekësore” të pretenduara nga Leipzigu. 

Asllani duhej t’u kthehej menjëherë stërvitjeve dhe me kthimin e shpejtë në klub shpresonin të largonin çdo dyshim të mbetur në lidhje me gjendjen fizike të 24-vjeçarit. Te Hoffenheimi madje nuk e përjashtuan plotësisht një transferim në një klub tjetër.

Por pas ndeshjes së parë për Kupë, Asllani humbi edhe ndeshjen hapëse të Bundesligës të shtunën në Koln, ndërsa Andrej Kramariq, i cili u kthye në stërvitje shumë më vonë pas Kupës së Botës dhe operacionit në ijë, u paraqit në fushë në minutat e fundit. 

“Kemi shumë javë intensive stërvitjeje parasezonale në këmbë, kështu që nuk është aq e lehtë për lojtarët që nuk kanë qenë plotësisht të përfshirë, të jenë pjesë e skuadrës”, u arsyetua trajneri Christian Ilzer për mospërfshirjen e Asllanit në ekip.

Për Kramariqin ishte e mundshme, por jo për Asllanin.

“Do të duhet ende pak kohë për Fisin. Ngarkesa e tij do të rritet gradualisht dhe do të futet në stërvitjen e ekipit”, përsëriti Ilzer të premten, duke shpjeguar: “Ai kishte një masë indi dhjamor në pjesën e përparme të gjurit, i cili i vonoi gjërat disi. Por gjithçka është në rregull. Ai gradualisht do ta rrisë ngarkesën e punës dhe do të marrë pjesë më shumë në stërvitjen e ekipit”. 

Kjo nuk duket si një rikthim i afërt me fanellën e Hoffenheimit.

Nëse problemi me gjurin që përmendi Ilzer është me të vërtetë i njëjti dëmtim dhe problem strukturor për të cilin është ankuar Leipzigu, mbetet e paqartë. Megjithatë, kjo do të kishte kuptim duke pasur parasysh të gjitha aludimet që kanë dalë deri më tani. 

“Ai nuk mori pjesë plotësisht në fazën parasezonale për shkak të transferimit të planifikuar. Prandaj, po e rikthejmë me një menaxhim të kujdesshëm të ngarkesës dhe po i japim kohën që të tjerët kanë pasur tashmë. Përveç kësaj, sezoni nuk vendoset në shtator”, shpjegoi drejtori sportiv Andreas Schicker për “Kicker”.

“Jemi gjithashtu në kontakt të ngushtë me mjekët, në mënyrë që ta rikthejmë gradualisht në stërvitje të plotë”.

Duket se nuk ka ndonjë kundërshtim themelor për këtë. Përndryshe, zyrtarët e klubit vështirë se do të kishin vendosur të zvogëlonin numrin e sulmuesve me huazimin e Alessandro Vogt te Heidenheimi.

Ata sigurisht që do të ishin përmbajtur nga kjo lëvizje nëse Asllani do të ishte transferuar përfundimisht ose nëse do të ishte parashikuar një periudhë më e gjatë mungese.