-
Од:
ББЦ
- 7. октобар 2026. 23:09
- Учешће у:
Vdiq gruaja e moshuar, dëbimi i së cilës nxiti protesta mbarëkombëtare për krizën e banimit dhe një përplasje politike që çoi në zgjedhje të parakohshme, njoftoi Sindikata e Qiramarrësve të Madridit.
Maricarmen Abascal, 87-vjeçare, më 23 shtator u nxor me forcë me barelë nga apartamenti ku kishte jetuar për më shumë se 70 vjet, pasi nuk kishte mundësi ta përballonte rritjen e qirasë.
Kompania që zotëronte apartamentin më vonë ofroi që ajo të kthehej me një qira më të ulët, por ajo nuk ishte në gjendje të nënshkruante marrëveshjen, pasi ishte shtruar në spital.
“Me keqardhje njoftojmë se Maricarmen vdiq sot”, tha në një deklaratë Sindikata e Qiramarrësve të Madridit, duke shtuar se situata e saj shënoi “një pikë kthese në historinë e këtij vendi“.
Abascal u bë simbol i krizës së banimit në Spanjë pas dëbimit të saj.
Babai i saj e kishte marrë me qira apartamentin për herë të parë në vitin 1956 dhe ajo vazhdoi të ishte qiramarrëse pasi prindërit e saj vdiqën. Gjatë kësaj periudhe, qiraja ishte e kufizuar me ligj.
Megjithatë, një boshllëk ligjor i lejoi pronarit, kompanisë së investimeve Urbagestión, ta rrisë qiranë nga 500 euro në 2.650 euro. Më vonë, ajo u ul në 1.650 euro – ende 300 euro më shumë se pensioni i saj mujor.
Tri përpjekje të mëparshme për ta dëbuar atë ishin bllokuar nga gjykatat dhe rasti kishte marrë gjithnjë e më shumë vëmendje mediatike.
Zemërimi për situatën u rrit, duke çuar në protesta dhe duke ushtruar presion ndaj Qeverisë së koalicionit për të miratuar legjislacion emergjent për banimin – por ai u rrëzua në Kongres javën e kaluar.
Kjo çoi në protesta të tjera, me dhjetëra mijëra njerëz që dolën në rrugë në qytete të ndryshme të vendit gjatë fundjavës.
“Ndërsa u arrit një marrëveshje historike që do t’i kishte mundësuar asaj të kthehej në shtëpinë e saj, kjo zgjidhje erdhi shumë vonë. Një situatë krejtësisht e shmangshme pas një procesi torturues”, tha Sindikata e Qiramarrësve të Madridit për projektligjin e rrëzuar.
Sindikata tha se ngjarjet rreth dëbimit të saj përfaqësonin një pikë kthese në historinë e vendit, por shtoi se çmimi për të arritur deri në këtë pikë kishte qenë “shumë i lartë“.
“Mbi të gjitha, ne do të përmbushim atë që ajo gjithmonë na kërkonte: ‘luftoni, vazhdoni të luftoni për atë që është e juaja’“, thuhet në deklaratë.
“E gjithë dashuria ime shkon për familjen dhe të dashurit e Maricarmenit“, tha kryeministri spanjoll Pedro Sánchez. “Një përqafim gjithashtu për të gjithë ata që sot e ndiejnë këtë humbje si të tyren".
Protestuesit u mblodhën në një prej shesheve kryesore të Madridit, Puerta del Sol, pas njoftimit për vdekjen e Abascalit. Sheshi është shndërruar në një kamp protestuesish gjatë dy javëve të fundit.
Më herët të mërkurën, sindikatat bënë thirrje për një grevë të përgjithshme më 11 nëntor, duke kërkuar reforma në sektorin e banimit.
Zemërimi publik për situatën e Abascalit ka shkaktuar trazira politike në Spanjë.
Të hënën, kryeministri Sanchez, i cili drejton një koalicion të majtë që nuk ka shumicën në Parlament, shpalli zgjedhje të parakohshme për 29 nëntor. Ky vendim erdhi pasi ai dështoi të miratonte në Kongres legjislacionin emergjent për banimin.
E djathta politike kishte argumentuar se përpjekja e Qeverisë për të ndërhyrë në tregun e banimit do të çonte në më pak banesa të ofruara me qira dhe do t’i rriste më tej çmimet.
Duke folur të hënën, Sanchez tha se kishte nevojë për “një shumicë më të gjerë progresiste“ që mund ta “kapërcejë rezistencën e elitave“ për të shtyrë përpara reformat.
Çështje të tjera që nuk lidhen me banesat, si skandale të shumta korrupsioni të lidhura me partinë e tij, si dhe presionet që lidhen me koston e jetesës dhe imigracionin, gjithashtu i kanë shkaktuar probleme.
Shumica e sondazheve të opinionit sugjerojnë se konservatorët pritet të dalin si partia më e madhe në zgjedhjet e ardhshme. Megjithatë, ata pritet të kenë nevojë për mbështetjen e partisë së së djathtës ekstreme Vox për të formuar qeverinë.