Shtetet e Bashkuara kanë larguar të gjithë bombarduesit e tyre nga baza ajrore RAF Fairford në Britani, konfirmoi të dielën një zyrtar i Pentagonit. Në bazë besohet se ndodheshin dhjetëra avionë B-1, të cilët janë kthyer në bazat e tyre në SHBA.
Tërheqja, sipas burimeve të BBC-së, është marrë si vendim operacional pas informacioneve të reja për një kërcënim të mundshëm të lidhur me Iranin pas incidentit që po hetohet nga policia kundër terrorizmit.
Pesë persona, të moshave 23 deri në 25 vjeç, u arrestuan fillimisht nën dyshimin për vepra që lidhen me eksplozivët dhe më pas për përgatitje të një akti terrorist. Të gjithë u liruan me kusht.
Më vonë, një person i gjashtë, 25 vjeç, shtetas britaniko-iranian, u arrestua në Londër nën dyshimin për përgatitje të akteve terroriste, i cili po ashtu u lirua me kusht.
Burime në qeverinë britanike nuk e kanë kundërshtuar informacionin se vendimi amerikan për tërheqjen e bombarduesve lidhet me incidentin në RAF Fairford. Sipas BBC-së, bëhet fjalë për një vendim ushtarak dhe operacional, jo politik, i marrë në nivelin e komandës ushtarake amerikane dhe i komunikuar palës britanike.
Ministria britanike e Mbrojtjes nuk ka komentuar publikisht mbi zhvillimet.
Sipas raportimeve të “The New York Times”, komandantët amerikanë kanë marrë informacione të reja për komplot të dyshuar, të mbështetur nga Irani, kundër bazës RAF Fairford.
Sipas dy zyrtarëve amerikanë të cituar nga gazeta, informacionet e reja përmbajnë detaje specifike që u bënë të njohura gjatë 24 orëve para largimit të avionëve.
Bombarduesit B-1 u larguan nga baza të dielën, ndërsa avionët amerikanë për furnizim me karburant në ajër po mobilizohen për t’i mbështetur gjatë fluturimit drejt SHBA-së.
Dyshimet për përfshirjen e Iranit janë ngritur edhe më herët. Kryeministri i Anglisë, Andy Burnham, deklaroi disa ditë pas incidentit se ka “indikacione të forta” për rolin e Iranit, pa dhënë detaje të mëtejshme.
Teherani ka mohuar fuqishëm çdo përfshirje.
RAF Fairford ka shërbyer për dekada si bazë e avancuar e Forcave Ajrore të SHBA-së në Evropë. Në muajt e fundit, nga kjo bazë janë operuar bombardues B-1 dhe B-52 në drejtim të Lindjes së Mesme, pasi Britania miratoi kërkesën amerikane për përdorimin e saj në operacione mbrojtëse ndaj Iranit.
Tërheqja e bombarduesve e zvogëlon praninë operacionale amerikane në një pikë strategjike jashtë territorit kontinental të SHBA-së.
Irani ka paralajmëruar në korrik se çdo bazë e përdorur për “agresion kundër territorit iranian” do të konsiderohej objektiv legjitim nga forcat e tij.
Megjithatë, SHBA-ja ruan mundësinë për të kryer operacione ajrore në distanca të mëdha edhe pa përdorur bazën në Britani.
Pentagoni ka theksuar se avionët bombardues amerikanë janë në gjendje të kryejnë misione “kudo dhe kurdo”, përfshirë operacionet që nisen dhe përfundojnë në territorin kontinental amerikan.