Policia britanike tha të enjten se ka ngritur aktakuzë ndaj një anëtari të Marinës Mbretërore për vepra penale sipas Aktit të Sigurisë Kombëtare nën dyshimin e marrjes së informacionit të mbrojtur dhe përgatitjen e zbulimit të tij në dobi të një fuqie të huaj.
Teddy Young, 24 vjeç, është akuzuar për dy vepra penale dhe do të paraqitet në Gjykatë në Westminster të Londrës më vonë të enjten. Policia nuk ka bërë të ditur vendin me të cilin dyshohet se bashkëpunoi Young, raporton BBC.
Policia tha se akuzat nuk ishin të lidhura me hetimin e fundit për incidentin në bazën ajrore RAF Fairford.
Young u arrestua në shtëpinë e tij në Bedfordshire të martën.
Akuzat lidhen me një periudhë midis 26 nëntorit 2024 dhe 21 majit 2025 dhe pretendohet se ai ka bërë përgatitje për kryerjen e një vepre penale të zbulimit të informacionit të mbrojtur.
Gjithashtu pretendohet se anëtari i shërbimit ka marrë, kopjuar, regjistruar ose ruajtur informacion të mbrojtur, duke synuar që kjo t'i sjellë dobi një fuqie të huaj, duke ditur ose duke pasur parasysh çështje të tjera që ai i dinte në mënyrë të arsyeshme se ishin të dëmshme për sigurinë ose interesat e Mbretërisë së Bashkuar.