Kreu i ri i Këshillit të Lartë të Sigurisë Kombëtare të Iranit, Mohsen Rezaei, ka thënë të dielën se Teherani planifikon të shpallë një “zonë përjashtimi” jashtë Ngushticës së Hormuzit, që do të synojë anijet që, sipas tij, përpiqen të kalojnë nëpër këtë rrugë ujore.
Komentet e Rezaeit për transmetuesin shtetëror iranian erdhën pa shumë detaje, një ditë pasi SHBA-ja goditi tre cisterna iraniane nafte, në përgjigje të lëshimit nga Teherani të raketave balistike drejt anijeve luftarake amerikane. Njohësit i cilësuan lëshimet e raketave si një përshkallëzim të rrezikshëm, pasi sulmet e mëparshme të Iranit në det kishin shënjestruar anije tregtare.
Zona e re pritet të shpallet në ditët ose javët e ardhshme dhe “do të nisë nga vija e bllokadës detare amerikane, do të shtrihet drejt Ngushticës së Hormuzit dhe nga kjo anë do të vazhdojë në Gjirin Persik”, ka thënë Rezaei.
“Çdo anije që hyn në këtë zonë me qëllimin për të kaluar përmes Ngushticës së Hormuzit dhe që identifikohet, do të vendoset në listën tonë të sanksioneve”, ka shtuar ai.
Nuk është e qartë se ku e përcakton Irani vijën e bllokadës amerikane, e cila prej disa javësh synon portet iraniane dhe pengimin e Teheranit për të eksportuar naftën. Ushtria amerikane ka thënë se më shumë se 20 anije luftarake po mbështesin bllokadën, e cila deri të dielën kishte devijuar 92 anije tregtare dhe kishte nxjerrë jashtë funksionit tri të tjera.
SHBA-ja po prezanton masa të reja për të shtuar presionin ekonomik mbi Iranin, pasi negociatat dështuan dhe nuk duket në horizont një përfundim i luftimeve sporadike.
Ndërkohë, Irani vazhdon të sulmojë disa prej anijeve që përpiqen të kalojnë Ngushticën e Hormuzit.
jo rrugë ujore është shndërruar në një mjet të rëndësishëm presioni për Teheranin në luftën që ka nisur më 28 shkurt me sulmet amerikane dhe izraelite ndaj Iranit.
Mëngjesin e së dielës Irani pretendonte se kishte goditur një anije amerikane pa ekuipazh që po përpiqej të hynte në Ngushticën e Hormuzit. Ushtria amerikane e ka hedhur poshtë pretendimin duke e cilësuar si një “gënjeshtër totale”.