Tesla ka pasur një muaj jashtëzakonisht të suksesshëm në Evropë gjatë shtatorit. Model Y dhe Model 3 zunë dy vendet e para në listën e veturave më të shitura, pavarësisht llojit të motorit. Madje, që nga fillimi i vitit 2026, Model Y është vetura më e shitur në Evropë, duke ia marrë këtë pozitë Dacia Sanderos.
Tregu evropian i veturave ka shënuar rritje të ndjeshme në shtator. Sipas të dhënave të “Dataforce”, regjistrimet u rritën për 10 për qind krahasuar me shtatorin e vitit 2025, duke arritur në gjithsej 1.34 milionë vetura.
Megjithatë, në mesin e kësaj rritjeje të përgjithshme, vëmendje të veçantë kanë tërhequr veturat elektrike. Të dhënat tregojnë se në qershor, gati një në katër vetura të regjistruara ishte elektrike, ndërsa në shtator kjo shifër arriti në një në tri. Tesla është ndër përfitueset kryesore të këtij trendi.
Rezultati i Model Y është mbresëlënës. Me 40.971 vetura të regjistruara në shtator, modeli i Teslas u rendit i pari në Evropë, duke lënë pas të gjitha modelet e tjera, pavarësisht llojit të motorit.
Nuk është hera e parë që Model Y zë vendin e parë, por këtë herë epërsia ndaj konkurrencës është e theksuar. Volkswagen regjistroi 18.088 vetura Golf, ndërsa Dacia 17.547 vetura Sandero, model ky që deri në shtator kryesonte listën evropiane.
Regjistrimet e Tesla Model Y u rritën për 55,3 për qind krahasuar me shtatorin e vitit të kaluar.
Dominimi i Teslas nuk kufizohet vetëm në rezultatet mujore. Gjatë nëntë muajve të parë të vitit 2026, Model Y regjistroi gjithsej 167.369 vetura në Evropë, me rritje prej 51,8 për qind.
Kjo shifër e vendos atë përpara Dacia Sanderos, me 162.969 njësi, dhe Volkswagen Golfit, me 151.334 njësi.
Falë këtij rezultati, Tesla ka mundësi reale që Model Y të shpallet vetura më e shitur në Evropë për të gjithë vitin 2026, duke përsëritur suksesin e vitit 2023.
Sipas raportimit, rritja e çmimeve të karburanteve po i shtyn blerësit drejt veturave elektrike.