Zyra e Presidentes së Republikës së Kosovës ka njoftuar se procedura për emërimin e anëtarëve të rinj të Komisionit Qendror të Zgjedhjeve (KQZ) ende nuk ka përfunduar, pasi është në pritje të përfundimit të verifikimeve të kandidatëve të propozuar nga subjektet politike.
Sipas njoftimit, pas pranimit të propozimeve me shkrim nga subjektet politike për anëtarët e KQZ-së, Zyra e Presidentes iu është drejtuar institucioneve kompetente të sigurisë me kërkesë për verifikimin e kandidatëve.
Afati pesëditor nga pranimi i propozimeve ka përfunduar të premten, megjithatë procedura e emërimit nuk është përmbyllur ende, pasi Zyra e Presidentes është duke pritur përgjigjet nga institucionet kompetente lidhur me verifikimet e kërkuara.
“Pas pranimit të këtyre përgjigjeve, Zyra e Presidentes do të ndërmarrë veprimet e mëtejme për përmbylljen e procedurës së emërimit të anëtarëve të Komisionit Qendror të Zgjedhjeve”, thuhet në njoftim.
