Протест у петак под слоганом „Третирајте фемицид као националну ванредну ситуацију“

Kolektivi për Mendim ka paralajmëruar protestë të premten në orën 12:00, në sheshin “Zahir Pajaziti” në Prishtinë, me moton “Vrasja e grave të trajtohet si urgjencë kombëtare”.

Thirrja për protestë ndodh pas dy rasteve të vrasjes së grave brenda së njëjtës javë në Malishevë dhe Prizren.

Kolektivi për Mendim i cilëson këto raste si femicid dhe thotë se vrasjet e grave nuk duhet të trajtohen si incidente të izoluara, por si pasojë e dhunës sistematike ndaj grave.

“Vrasjet e grave nuk janë incidente, por vrasje të qëllimshme që targetojnë gratë nëpërmjet cenueshmërisë dhe nënshtrimit të supozuar nëpërmjet dhunës. Ne refuzojmë ta lexojmë femicidin, pra vrasjen e grave veç pse ato janë gra si tragjedi të izoluar që ua merr sporadikisht jetën grave qoftë se burrat kanë probleme psikologjike, apo se për çfarëdo arsye tjetër. Ne e njohim atë në të vërtetën e saj: si kulminacion i dhunës sistematike që iu bëhet grave prej një sërë sistemesh ndërthurëse që shtypin, nënshtrojnë, përçmojnë e shtrëngojnë gruan në çdo sferë e marrëdhënie të saj qoftë shoqërore, qoftë ekonomike. E në këtë kuptim, shteti bëhet bashkëfajtor i çdo vrasjeje të grave. Është shteti ai që strukturalisht e nënvlerëson jetën e grave si klasë, e neglizhon sigurinë e tyre në shtëpi, në rrugë e institucione, nuk iu beson grave, i lë ekonomikisht të dobëta dhe të kthyeshme në dhunë e ushqen pabarazitë përmes edukimit dhe organizimit të ekonomisë”, thuhet në reagim.

Në kuadër të protestës, Kolektivi për Mendim ka paraqitur disa kërkesa, ndër to trajtimin e sigurisë së grave si çështje të urgjencës kombëtare dhe pjesë të sigurisë publike, rritjen e përgjegjësisë institucionale dhe funksionalizimin e mekanizmave për parandalimin e femicidit.

Po ashtu, kërkohet financim më i madh i politikave sociale që synojnë uljen e pabarazive gjinore dhe ekonomike, kodifikimi i femicidit si vepër e veçantë penale dhe përfshirja e “edukimit gjithëpërfshirës në sistemin arsimor për trajtimin e maskulinitetit toksik dhe promovimin e barazisë gjinore”.