Sport

Vokrri i kërkon Haradinajt të shpejtohen punët për infrastrukturën sportive

Kryeministri i Republikës së Kosovës, Ramush Haradinaj priti Kryetarin e Federatës së Futbollit të Kosovës, Fadil Vokrrin me bashkëpunëtorët.

Ata i ofruan Haradinajt bashkëpunim të parezervë në realizimin e objektivave qeverisëse sa i përket futbollit kosovar dhe infrastrukturës, por edhe plotësimit dhe zbatimit të Ligjit për Sponsorizim.

“Në këtë takim shumë miqësor u theksua nevoja e përfshirjes së Qeverisë Haradinaj, përkatësisht të MKRS dhe Ministrisë së Financave në përshpejtimin e mbarimit të punëve në stadiumin e KF ‘Prishtina’ (u kërkua që të shikohet mundësia që gjatë rishikimit të buxhetit të shtetit për vitin 2017 të intervenohet me rreth 3 milionë euro që garantojnë kryerjen e këtij stadiumi të standardeve të UEFA-s) si dhe të nisë operacionalizimi i punëve rreth stadiumit nacional në Bërnicë”, thuhet në njoftimin e Zyrës së Kryeministrisë.

Kryetari i FFK-së Fadil Vokrri, e njoftoi kryeministrin Haradinaj për fillimin e studimit të fizibilitetit për stadiumin kombëtar, që do të ndërtohet në Bërnicë të Prishtinës dhe kapacitetet që ai do të ketë si dhe për objektet e tjera përcjellëse.

Kryetari i FFK-së Vokrri ia dhuroi kryeministrit Haradinaj fanellën e përfaqësueses kosovare në futboll, me numrin 1, për çka kryeministri ishte shumë mirënjohës.

Image