Sport

Dortmundi shpreson që Schalke ta ndalë Bayernin

Në garë për titull të Gjermanisë, Borussia Dortmundit i duhet ndihma e rivalit, Schalkes, që do të luajë në udhëtim te Bayern Munichu.

Ndeshja Bayern Munich – Schalke luhet të shtunën nga ora 15:30 dhe i takon xhiros së 32-të. Bundesliga i ka gjithsej 34 xhiro.

Ky ballafaqim zhvillohet disa orë para se Dortmundi e Moenchengladbach të takohen nga ora 18:30.

Kampioni i shumëfishtë i Gjermanisë, Bayerni, ka 65 pikë në pozitën e parë, një më shumë se Dortmundi i vendit të dytë.

Bayerni më pas takohet me Leipzigun dhe e mbyll kampionatin në udhëtim te Koelni. Dortmundi udhëton tek Augsburgu në xhiron e parafundit, kurse në takimin e fundit e pret Mainzin.

Rivaliteti mes Dortmundit e Schalkes është shumë i madh, ndoshta më i madhi në elitën e futbollit të Gjermanisë.

Dhe për këtë arsye Schalke mund të jetë skuadra e fundit në Gjermani që do t’i bënte favor Dortmundit.

Por Schalke zë pozitën e 15-të me 30 pikë, vetëm dy më shumë se Stuttgarti që është në pozitën që dërgon në plejaut dhe Bochumi që është i parafundit në tabelë.

Prandaj pikët janë me shumë peshë për Schalken.

I pari i qytetit të Dortmundit, Thomas Westphal, këtë javë ka thënë se do ta ftonte ekipin e Schalkes për t’u nënshkruar në “Librin e Artë”, në të cilin shënohen vetëm ngjarjet e veçanta.

Trajneri i Schalkes, Thomas Reis, ka thënë se nga Dortmundi duhet të vijnë ide të tjera.

Schalke i ka humbur 11 ndeshjet e fundit kundër Bayernit.

Herën e fundit kur Schalke mposhti Bayernin ishte në vitin 2011.

Megjithatë, Schalke i ka fituar tri nga katër ndeshjet e fundit për të dalë në zonën e mbijetesës për herë të parë që prej muajit shtator.

Trajneri i Dortmundit, Edin Terziq, që u rrit si tifoz i skuadrës së verdhë, nuk ka folur për situatën e Schalkes.

Ai ka thënë se Dortmundi duhet t’i fitojë tri ndeshjet e mbetura.

Bavarezët kanë fituar për herë të parë dy ndeshje rresht me Thomas Tuchelin në krye të skuadrës. Ai e di se edhe tri fitore të tjera do t’ia sigurojnë Bayernit titullin e 11-të rresht, pavarësisht rezultateve të Dortmundit.