Me gjithë fuqinë sulmuese që solli Brazili në Kampionatin Botëror, mbrojtja ka bërë më shumë përshtypje për pesë herë kampionin e botës në Katar. Pas dy ndeshjesh, Brazili nuk ka lejuar ende një tentativë në portë dhe portieri Alisson Becker ka qenë kryesisht spektator. Mesfushori defensiv Casemiro ka qenë pothuajse i përsosur në vijën e parë të mbrojtjes, me qendërmbrojtësit Thiago Silva dhe Marquinhos që po paraqiten në një nivel të lartë që nga fillimi i turneut.
“Ne e kemi mbajtur një paraqitje të mirë në mbrojtje”, tha Silva 38 vjeç, një nga veteranët e Brazilit. “Kjo u jep besim lojtarëve tanë përpara; ata kanë më shumë liri për të sulmuar”.
Brazili do të kërkojë ta ketë këtë formë në ndeshjen e fundit të Grupit G, kundër Kamerunit të premten, kur do të mjaftojë një barazim për t'ia dhënë vendin e parë. Mbrojtja e mirë nga skuadra e trajnerit Tite nuk është diçka e re. Në 78 ndeshjet e Brazilit nën komandën e tij, “Seleçao” pësoi vetëm 27 gola. Ai ka udhëhequr Brazilin në 59 fitore, 14 barazime dhe pesë humbje. Brazili e hapi kampanjën në Kupën e Botës duke mposhtur Serbinë 2:0, me dy gola në pjesën e dytë nga sulmuesi Richarlison, përpara se të triumfojë 1:0 ndaj Zvicrës, me golin e Casemiros në minutën e 83-të. Hera e fundit që Brazili nuk pranoi në fazën e grupeve ishte në vitin 1986, kur luajti në një grup me Spanjën, Algjerinë dhe Irlandën e Veriut në turneun e mbajtur në Meksikë. Të vetmet skuadra të tjera që nuk pranuan gol pas dy ndeshjeve të para në grup në Katar ishin Polonia dhe Maroku. Por, Brazili ishte i vetmi nga tria që shënoi fitore në dy ndeshjet e para. Tite zgjodhi një skuadër me mendje sulmuese për Kupën e Botës duke marrë nëntë sulmues në Katar, por ai humbi yllin më të madh të ekipit, Neymarin që dëmtoi ligamentet e nyjës së këmbës të djathtë në ndeshjen kundër Serbisë.
Brazili luftoi pa Neymarin kundër Zvicrës dhe ishte Casemiro ai që shënoi golin e fitores. Brazili asnjëherë nuk u kërcënua realisht në ndeshjet kundër Serbisë dhe Zvicrës, ku secila pati nga katër tentime, por asnjërën në portë. Brazili e mbajti portën të paprekur pavarësisht se humbi disa prej lojtarëve në repartin e mbrojtjes – Danilo u lëndua në ndeshjen e parë, ndërsa Alex Sandro në të dytën. Trajneri Tite përdori Eder Militaon, i cili zakonisht luan si qendërmbrojtës te Real Madridi, në pozicionin e Danilos kundër Zvicrës dhe me Alex Tellesin zëvendësoi Sandron. Tite mund të përdorë gjithashtu edhe veteranin Dani Alves në pozitën e mbrojtësit të djathtë kundër Kamerunit. Me vendin e tij në 1/8 e finales tashmë të siguruar, Tite pritet të bëjë ndryshime në formacion kundër Kamerunit. Brazili do të përpiqet të fitojë ndeshjen e dhjetë rresht, e cila do të lidhej me serinë e mëparshme të fitoreve me Titen në krye nga viti 2019 deri në vitin 2021.
-
30 nëntor 2022 22:05
-
Shpërndaje në: