Një tjetër arritje e madhe personale. Pavarësisht të gjitha zhvillimeve rreth Cristiano Ronaldos para, siç llogaritet Kupës së Botës së fundit për të, i madhi i Portugalisë ende po lë gjurmë.
Të enjten ai u bë futbollisti i parë që shënon në pesë Kupa të Botës.
Më herët gjatë këtij sezoni, ai regjistroi 700 gola në nivel klubesh. Jo keq për një 37-vjeçar, i cili nuk e di se ku do të luajë pas përfundimit të turneut në Katar, pasi kontrata e tij me Manchester Unitedin është shkëputur. Shkëputja e kontratës u bë pas intervistës kritikuese për trajnerin Erikn ten Hag dhe pronarët e klubit.
Fitorja ndaj Uruguait të hënën në ndeshjen që nis në orën 20:00, do t’ia siguronte Portugalisë kualifikimin nga Grupi H në fazën nokaut. Në takimin e parë, Portugalia mposhti Ganën, 3:2.
“Ky është vetëm fillimi”, ka shkruar Ronaldo në një postim në Instagram, duke shtuar se “nuk ka të pamundura”.
Por nëse njeriu i shifrave të jashtëzakonshme dëshiron ta arrijë ambicien për ngritjen lart të trofeut që i mungon, Ronaldo duhet të ketë përkrahjen e bashkëlojtarëve.
Kjo pak a shumë u tregua edhe kundër Ganës, kur Portugalisë iu deshën golat e Joao Felixit dhe Rafael Leaos, për të shënuar fitore.
Felix është trashëgimtari i mundshëm i fronit të Ronaldos – dhe madje ai është përfolur se mund t’i bashkohet Unitedit në të ardhmen.
Nëse në Katar është Kupa e Botës ku Ronaldo mund të festojë për herë të fundit, lëvizjet nuk janë edhe aq të rrjedhshme siç ishin dikur.
Goli i tij kundër Ganës erdhi nga penalltia dhe jo nga një moment i një madhështie individuale mbi të cilën është ndërtuar karriera e tij.
Anëtari i grupit të studimit teknik të FIFA-s, Sunday Oliseh, e përshkruan atë si “gjeni total”, me aftësinë për ta fituar një faull të diskutueshëm nga Mohammed Salisu. Përzgjedhësi i Ganës, Otto Addo, kishte insistuar se nuk është dashur të akordohej ajo penallti.
Festimet e Ronaldos kanë dëshmuar se atij nuk i intereson se prej nga vijnë golat, derisa vazhdojnë të shënohen. Por Portugalia nuk mund të mbështetet vetëm në momente të tilla. Dhe ka lojtarë të tjerë që mund të jenë vendimtarë, po ashtu.
Jo më pak se sulmuesi i Atletico Madridit, Felix, mesfushori i Unitedit, Bruno Fernandes, dhe Bernardo Silva i Manchester Cityt.
“Kemi lojtarë që janë më të mirë se të tjerët dhe ata duhet të pajtohen me këtë, me prioritetin dhe presionin e lartë”, ka thënë Fernando Santos, selektori portugez në konferencën për shtyp të dielën para ndeshjes në “Lusail Stadium”. “Ata e shprehin veten në një mënyrë të veçantë. Ka lojtarë që janë më të hapur, disa prej tyre më të mbyllur. Por më e rëndësishmja është se ata luajnë si grup, luajnë së bashku si një ekip”.
Portugalia do të luajë pa Danilo Pereiran, i cili ka pësuar thyerje të brinjëve në stërvitje.
Pepe, qendërmbrojtësi 39-vjeçar, mund ta zëvendësojë atë.
Uruguai barazoi 0:0 me Korenë e Jugut në ndeshjen e parë të turneut.
Njësoj si Portugalia, Uruguai është i ndërtuar me të vjetër e të rinj. Rivali për kohë të gjatë i Ronaldos nga koha te Real Madridi dhe Barcelona respektivisht, Luis Suarez, do të jetë në sulm, bashkë me gjeneratën e re të talenteve, Darwin Nunez dhe Facundo Pellistri.
Në moshën 35-vjeçare, Suarez nuk është i freskët siç ishte dikur, dhe u zëvendësua pas vetëm një ore lojë kundër Koresë së Jugut. Një tjetër 35-vjeçar, Edinson Cavani, e zëvendësoi atë, por Uruguai nuk arriti ta gjente rrugën e golit.
“Kam thënë se nuk kemi mundur të paraqitemi në mënyrën më të mirë”, ka thënë përzgjedhësi i Uruguait, Diego Alonso. “Megjithatë, ne kemi pasur gjashtë shanse të shënonim, ndërsa ata një”.
Gana zbuloi problemet në mbrojtjen e Portugalisë, por Uruguai do të duhet të jetë shumë më efikas nëse dëshiron që të dalë fitues të hënën.
© KOHA. Të gjitha të drejtat janë të rezervuara.
