Andres Guardado dhe Guillermo Ochoa do ta bëjnë Meksikën përfaqësuesen e parë që ka dy lojtarë në të njëjtin turne e që marrin pjesë në Kupën e pestë të Botës. Guardado dhe Ochoa bënë debutimin e tyre te Meksika më 14 dhjetor të vitit 2005. Që atëherë ata kanë qenë në çdo edicion të Kupës së Botës.

“Unë shikoj prapa dhe jam krenar për atë që kam arritur deri këtu”, tha Guardado. “Nuk është e lehtë të qëndrosh këtu. Duhet punë e madhe për të mbajtur një nivel të lartë garues ditë pas dite dhe të vazhdosh të merresh në konsideratë nga përfaqësuesja”.

Dyshja do të bëjë histori kur Meksika të përballet me Poloninë në ndeshjen hapëse të tyre më 22 nëntor, në kuadër të Grupin C. Ish-lojtari i madh i Gjermanisë, Lothar Matthaus, ish-portieri i Italisë, Gianluigi Buffon dhe një çift tjetër meksikanësh, Antonio Carvajal dhe Rafael Marquez, kanë luajtur më parë në pesë Kupa Botërore, por asnjëri nuk ishte shok skuadre në turne. Në ngjarjen e këtij viti në Katar, Lionel Messi dhe Cristiano Ronaldo do t'i bashkohen grupit të përzgjedhur që luan për herën e pestë në Kupën e Botës.

Guardado dhe Ochoa kanë ndarë të njëjtën zhveshtore që nga ajo ditë në dhjetor të vitit 2005, kur Meksika mundi Hungarinë 2:0 në një ndeshje miqësore.

“Është më e lehtë ta ndash me një mik. Dhe për shkak se kishim diçka të përbashkët nga dita e parë, është një rrugë dhe një udhëtim që më ka pëlqyer vërtet me të”, tha Guardado, një mesfushor që luan në Spanjë me fanellën e Real Betisit. Guardado bëri debutimin e tij në ligën meksikane në gusht të vitit 2005. Ftesa për të luajtur për Meksikën i erdhi pak më vonë dhe ai ishte në rrugë për në Botërorin e parë që u mbajt në Gjermani, gjashtë muaj pas debutimit në përfaqësuese.

“Kupa ime e parë e Botës është një kujtim i bukur, sepse isha duke luajtur në divizionin e dytë një vit më parë”, tha Guardado. “Ishte si të shkoja në pushime me idhujt e mi dhe isha si një nxënës që përpiqej të mësoja nga të gjithë. Kam luajtur vetëm një lojë, por nuk e prisja atë përvojë në atë moment të jetës sime.”

Rruga e Ochoas ishte pak më ndryshe. Portieri bëri debutimin në ligë në gusht të vitit 2004 me America, një nga ekipet më të njohura në Meksikë. Më pas u zgjodh nga trajneri argjentinas Ricardo La Volpe për të shkuar në Gjermani në vitin 2006 pas titullarit Oswaldo Sanchez dhe Jose de Jesus Corona.

Ochoa ishte në stol në Afrikën e Jugut katër vjet më vonë, pas Oscar Perez, por bëri debutimin në Kupën e Botës Brazili 2014 dhe ka qenë titullar për Meksikën që atëherë.

“Fokusi ka ndryshuar. Në Botërorin tim të parë e dija se nuk do të luaja, kjo më hapi oreksin. E provova dhe thashë: ‘Tani dua ta jetoj Kupën e Botës në fushë’”, tha Ochoa, i cili është kthyer në Meksikë për të luajtur me American. “Tani përgjegjësia ka ndryshuar, plakeni, keni më shumë minuta, më shumë përvojë dhe duhet të drejtoni të rinjtë”.

Gjatë viteve të tyre së bashku me Meksikën, Ochoa dhe Guardado u bënë shokë dhome dhe krijuan një miqësi që ka tejkaluar përfaqësuesen. Dhe me daljen në pension të Marquezit pas turneut të fundit në Rusi, të dy janë bërë edhe kapitenët e ekipit. Së bashku ata udhëheqin një ekip që do të shkojë në Kupën e Botës të rrethuar nga dyshimet, jo vetëm për shkak të paraqitjeve të dobëta në kualifikime dhe në ndeshjet e fundit miqësore, por edhe për shkak të dëmtimeve të Raul Jimenezit dhe Jesus Coronas.

Corona u la jashtë ekipit dhe Jimenez është ende duke u rikuperuar nga një dëmtim dhe nuk ka luajtur që nga 31 gushti.

“Njerëzit thonë se ka më shumë pesimizëm tani, por unë ndiej se kjo është gjithmonë situata rreth përfaqësueses”, tha Guardado. “Në Kupën e Botës ne dimë si të garojmë. Meksika dhe Brazili që nga viti 1994 janë të vetmet që kualifikohen çdoherë në raundin e dytë dhe ne duhet ta dëshmojmë këtë përsëri. Do të jetë e vështirë, por ne jemi gati për sfidën”.

Meksika, e cila do të përballet me Argjentinën dhe Arabinë Saudite pas ndeshjes hapëse kundër Polonisë, po kërkon të kalojë në çerekfinale për herë të parë që nga organizimi i turneut në vitin 1986.

“Roli që duhet të marrim është i njëjti që kemi pasur në të gjitha Kupat e Botës së mëparshme. Në short kemi pasur grupe të vështira dhe kemi mundur t'i kalonim”, tha Ochoa. “Tani Meksika duhet të jetë surpriza e Katarit dhe të shkojmë sa më larg që mundemi”.

Ndryshe, Kupa e Botës do të mbetet e paharrueshme për Meksikën vetëm me dy “Cinco Copas” (bashkëlojtarë në pesë Botërorë) në të njëjtin turne.