A do të jetë ky viti që Meksika të kapërcejë më në fund mallkimin e Kupës së Botës “quinto partido”? Ka shumë pengesa për “El Tri” për të arritur deri atje. Meksika ka përjetuar edhe paraqitje të dobëta kohët e fundit dhe një sërë lëndimesh të lojtarëve kyç, ndërsa skuadra përgatitet për Kupën e Botës. Dhe, meksikanët janë në një grup të vështirë në Katar. Meksika ka arritur në rundin eliminator në secilën nga shtatë Kupat e Botës së fundit, por nuk ka arritur në çerekfinale – “quinto partido” ose ndeshjen e pestë.
“Ne duhet të shkojmë atje me një mentalitet shumë të fortë, me një motivim shumë të fortë që mund të shkruajmë historinë në Katar”, tha mesfushori Hector Herrera, i cili luajti për Atletico Madridin përpara se të nënshkruante me Houston Dynamon në MLS këtë vit. Raul Jimenez, i cili luan si sulmues për Wolverhamptonin, është duke vuajtur nga një dëmtim në ijë. Dhe, Jesus “Tecatito” Corona, i cili luan për Sevillan, ka një frakturë të fibulës që mund ta mbajë jashtë Kupës së Botës. Megjithatë, si Jimenez, ashtu edhe Corona janë përfshirë në listën preliminare të Meksikës. Të dy munguan në dy miqësoret e fundit në Kaliforni së bashku me Herreran, Rogelio Funes Morin, Jorge Sanchezin e Luis Romon. Meksika mposhti Perunë 1:0, por pësoi nga Kolumbia 3:2. Ka edhe dy ndeshje të tjera të akorduara kundër Irakut dhe Suedisë në Spanjë përpara se të shkojë në Katar. Meksika përfundoi e dyta në kualifikimet e CONCACAF-ut pas Kanadasë – dhe përpara SHBA-së – por skuadra e përzgjedhësit Tata Martino shënoi vetëm katër gola në pesë ndeshjet e fundit kualifikuese, pavarësisht se kishte në dispozicion edhe Jimenezin dhe Coronan. Pas dy miqësoreve në Kaliforni, Meksika i ka fituar vetëm dy nga shtatë ndeshjet e fundit.
“Nga perspektiva e futbollit, ne duhet të jemi më efektivë”, tha portieri Guillermo Ochoa. “Kemi bërë ndeshje të mira, por këtë nuk e kemi treguar në rezultat”.
Grupi intrigues dhe historia
Meksika, aktualisht e renditur në vendin e 13-të në botë, do të luajë në Grupin C me Argjentinën që është e treta, Poloninë (26) dhe Arabinë Saudite (51). Ndeshjen e parë në Katar, Meksika do ta luajë kundër Polonisë dhe Robert Lewandowskit më 22 nëntor. Më pas është Lionel Messi dhe Argjentina më 26 nëntor, para duelit të fundit me Arabinë Saudite që luhet më 30 nëntor. Argjentina pritet të avancojë nga faza e grupeve, pasi është favoritja kryesore edhe për titull. Ndeshja hapëse midis Polonisë dhe Meksikës duhet të bëjë një rrugë të gjatë në përcaktimin e të mbijetuarit tjetër të grupit.
Meksika u eliminua nga Brazili (2:0) në 1/8 e finales në Rusi, duke shënuar herën e shtatë radhazi që nuk arrin të shkojë në çerekfinale - ose ndeshjen e pestë - në turneun kryesor të futbollit. Meksika është kualifikuar në 17 Kampionate Botërore, duke përfshirë edhe turneun në Katar. Skuadra arriti në çerekfinale dy herë, së pari në vitin 1970 dhe përsëri në vitin 1986. Meksika ishte organizatore e të dy këto turneve.
Mungesa e Chicaritos dhe kritikat
Edhe pse Meksika ka shumë lojtarë të lënduar, Martino njoftoi përfundimisht se Javier “Chicharito” Hernandez nuk do të jetë pjesë e ekipit për në Katar. Chicharito ka luajtur në tre ngjarje të Botërorit dhe është golashënuesi më i mirë i të gjitha kohërave te Meksika, me 52 gola.
“Në rastin e Chicharitos, ne thjesht po shkojmë me sulmues të tjerë”, tha Martino.
Përkundër mungesës së Chicaritos, Meksika duket se po mbështetet te lojtarët veteranë, përfshirë Ochoan, Herreran e Andres Guardadon. Ochoa (37) dhe Guardado (36), kanë luajtur në katër Kupa Botërore. Herrera (32) ka luajtur në dy. Meksika dhe Martino, në mënyrë specifike, u përballën me kritika në prag të Botërorit për rezultatet e dobëta dhe mungesën e perceptuar të përgatitjes.
© KOHA. Të gjitha të drejtat janë të rezervuara.
