Vllaznia e Shkodrës ka shënuar sukses historik në futbollin e femrave në Shqipëri.
Skuadra shkodrane është kualifikuar në fazën grupore të Ligës së Kampionëve.
Vllaznia të mërkurën gjatë ditës mposhti skuadrën ukrainase Vroskla Potlava me rezultatin 2:1, në ndeshjen kthyese të fazës së plejofit për kualifikim në “Champions”.
Ndeshja e parë e zhvilluar në stadiumin “Loro Boriçi” javën e kaluar kishte përfunduar 1:1.
Të dyja ndeshjet u zhvilluan në Shkodër për shkak të luftës në Ukrainë.
Tarah Lynn Petterson në minutën e 35-i dha avantazhin skuadrës vendëse.
Në minutën e 84-rt, Olga Osipyan e Vorsklas dështoi përballë portieres Kaylin Conner Williams-Mosier.
Nga goditja e këndit, një minutë më pas, skuadra ukrainase shënoi golin e barazimit. Realizatore ishte Katerina Korsun.
Por vetëm tre minuta më vonë, Gresa Berisha pasi fitoi një top afër zonës, gjuajti fuqishëm dhe shënoi golin historik për Vllazninë e Shkodrës.
Shkodranet do t’i mësojnë kundërshtarët në fazën e grupeve më tre tetor në shortin që do të tërhiqet në Nyon të Zvicrës.
Faza e grupeve në Ligën e Kampionëve nis më 19 tetor.
-
28 shtator 2022 18:13
-
Shpërndaje në: