Ndonëse pa gjasa për kualifikim në gjysmëfinale, Kroacia ka shënuar fitore ndaj Islandës, të hënën në raundin kryesor të Kampionatit Evropian të hendbollit. Kroacia fitoi 23:22 në Budapest, falë paraqitjes impresive të portierit Ivan Peshiq. Ai nuk pranoi gol në shtatë minutat e fundit, duke qenë vendimtar.
Peshiq ndali dy gjuajtjet e fundit para se Ante Gagja të shënonte golin e fitores, pak sekonda para fundit të takimit. Peshiq gjithsej i kishte 13 pritje. Ndërkohë portieri i Islandës, Viktor Hallgrimsson i kishte 11 pritje dhe po ashtu u shqua me paraqitje. Kroacia mbetet e fundit në Grupin I me dy pikë. Islanda i ka katër pikë në vendin e tretë dhe është ende në garë për gjysmëfinale, ndonëse me më pak gjasa.
Pas dy ditësh Islanda luan me Malin e Zi, ndërsa Kroacia me Holandën. Islandës i duhet fitorja për të shpresuar në gjysmëfinale, por do të varet edhe nga rezultatet e tjera.
-
24 janar 2022 17:47
-
Shpërndaje në: