Trajneri gjerman, Juergen Klopp, do të mbetet në krye të Liverpoolit edhe pas përfundimit të sezonit aktual, ka raportuar të mërkurën “Sky Sports Germany”.

Në fakt, agjenti i tij, Marc Kosicke ka thënë se Klopp është tërësisht i dedikuar pas Liverpoolit dhe nuk do të largohet nga ekipi edhe nëse nuk arrin të siguroj një vend që sezonin tjetër garanton pjesëmarrjen në kupat e Evropës.

“Nuk ka diskutim, Klopp do të jetë trajner i Liverpoolit edhe sezonin e ardhshëm”, ka insistuar Kosicke.

Kampioni në fuqi, Liverpooli këtë edicion ka pasur rezultate të dobëta dhe aktualisht është në pozitën e shtatë në tabelë me 54 pikë të mbledhura kur kanë mbetur edhe katër xhiro deri në përfundim të këtij sezoni.

Klopp, 53-vjeçar, është trajneri i Liverpoolit prej vitit 2015 dhe ka kontratë deri në vitin 2024.

Krahas titullit të kampionit të Anglisë, Klopp e ka fituar me Liverpoolin edhe trofeun e Ligës së Kampionëve, Superkupën e Evropës dhe botërorin e klubeve.