SOT

Fëmijët me interes të lartë për shkolla të programimit

95 për qind e fëmijëve në botë kanë qasje në botën e teknologjisë. Këtë e konstaton Qendra Ndërkombëtare për Studime Edukative në botë.

Edhe fëmijët në Kosovë shprehin interesim për përdorimin e kompjuterëve dhe telefonave.

“Probit Academy” është njëra nga shkollat në fushën e teknologjisë, e cila ofron kurse për fëmijë.

Pjesë e kësaj akademie është edhe 9-vjeçarja, Rejana Bajrami.

Ajo tregon se arsyeja e ardhjes në këtë shkollë është dëshira për t’u bërë programere.

Një kategori më e lartë se klasa e Rejanës është niveli i avancuar, në të cilin vijon mësimet Angjelos Çomani.

E gjitha bota është e drejtuar nga teknologjia për momentin, sipas 12-vjeçarit, andaj edhe ai do të zhvillojë një karrierë të suksesshme në këtë drejtim.

Drejtori i kësaj shkolle, Hysen Blakaj, thotë se rinia duhet të jetë në hap me kohën.

Blakaj shton se interesimi i fëmijëve për të ndjekur një kurs teknologjie është i lartë, mirëpo edhe aftësia e mësimnxënies tek ta vërehet dukshëm.

Një tjetër shkollë programimi është edhe Shkolla Digjitale.

Lonita Mjeku e Vlera Cakolli janë nxënëse në këtë shkollë.

Ato tregojnë përvojën e tyre, mësimet që kanë marrë e për çfarë ju kanë shërbyer këto mësime.

E Enes Uka mësimet në programim e ka ndërmend t’i vazhdojë gjatë.

Ai madje mendon që në të ardhmen të drejtojë vetë një kompani teknologjike.

Instruktorja e shkollës digjitale, Liburna Mehmeti, thotë se nxënësit kanë mjaft entuziazëm e vullnet për të përvetësuar mësimet këtu.

Kjo është arsyeja pse ata shumë shpesh organizojnë aktivitete për fëmijë.

Orientimi i tregut të punës çdoherë e më shumë nga bota teknologjike po i bën prindërit t’u ofrojnë kurse në mosha shumë të hershme, që të marrin mësimet e nevojshme e të ndërtojnë një karrierë me sukses.