Është ndër shkollat më të vjetra në Prishtinë.

Derisa ruan pamjen e karakteristikat e tjera, shkolla fillore “Elena Gjika’ ruan edhe një veti tjetër me të cilën veçohet, atë të tolerancës e mësimit mes nxënësve shqiptarë e të komunitetit turk.

Janë 9 paralele në të cilën nxënësit shkruajnë e flasin gjuhën turke, por duke mësuar edhe shqipen një herë në javë.

Nxënësit e klasave 8 dhe 9 thonë se aty ndihen si gjithë nxënësit e tjerë, ku nuk ka asnjë lloj diskriminimi.

Sporti e piktura thonë se i bën bashkë nxënësit turq dhe shqiptarë.

Drejtori i shkollës, Betim Sylejmani, thotë se literatura e paraleleve turke është e kompletuar dhe se në gara të ndryshme në nivel Kosove nxënësit marrin pjesë në bazë të talentit e dijes e jo të nacionalitetit.

Paralelet turke janë hapur në zonën e Prishtinës së Vjetër në vitin 1951.

Shkolla ka arritur të marrë edhe fonde e investime nga Tika e Turqisë dhe në investimin e fundit aty u rinovuan 18 klasa, 3 klasa parashkollore, 1 bibliotekë e korridoret.