Katy Perry po lanson podcastin bazuar në jetën e aktores legjendare Elizabeth Taylor.

Ylli 37-vjeçar i popit “ka ndier gjithmonë një lidhje farefisnore” me aktoren ikonike - e cila vdiq në vitin 2011 në moshën 79-vjeçare – që do të rrëfejë serialin audio me dhjetë pjesë “Elizabeth the First”.

Në një deklaratë, Katy tha: “Ashtu si shumica e njerëzve, edhe mua më tërhiqte sharmi i saj dhe në jetën time vazhdoj ta gjej veten duke iu referuar asaj përmes disa prej pamjeve të mia. Gjithmonë kam ndier një lidhje farefisnore ndaj saj”.

Elizabeth mbahet mend për rolin kryesor në epikën “Cleopatra” të vitit 1963 - bazuar në jetën e mbretëreshës së lashtë egjiptiane - por ishte gjithashtu ndër të famshmit e parë që mori pjesë në aktivizmin e HIV/AIDS, një lëvizje që krijuesja e hitit “I kissed a girl” e gjen "frymëzues".

“Jam frymëzuar nga aktivizmi i saj i guximshëm, nga hapat e saj në biznes, e mbi të gjitha nga mënyra e pafalshme e të dashuruarit – të gjitha gjërat që unë përpiqem t’i kem në jetën time. Është nder për mua ta ndaj historinë e saj në këtë mënyrë”, ka shtuar Katy.

Seriali do të shfaqë histori nga njerëzit më të afërt me Elizabeth dhe do të ketë intervista audio që janë ekskluzive nga pasuria e saj në House of Taylor dhe do të prekë edhe njoftimin e saj publik të atëhershëm novator, kur ajo po kërkonte ndihmë për alkoolizmin dhe varësinë e saj nga droga.

House of Taylor tha në një deklaratë: “Jemi krenarë të shpallim këtë podcast vërtet inovativ dhe unik për Elizabeth. Gjatë jetës së saj, Elizabeth Taylor ishte pa dyshim gruaja më e famshme në botë. Si e tillë, u fol, u shkrua për të deri në pafundësi. Ajo gjithashtu u gjykua, u analizua dhe jetoi jetën e saj nën vëzhgimin e vazhdueshëm të shtypit dhe publikut. Ajo që e bën “Elizabeth the First” jashtëzakonisht të veçantë është se ky do të jetë rrëfimi i parë që eksploron Elizabetën si multihifenate origjinale”.

“Elizabeth the First” do të debutojë më vonë këtë pranverë në të gjitha platformat kryesore të podcasteve, përfshirë Apple dhe Spotify.