Cuba Gooding Jr. është akuzuar për prekje të pahijshme të disa femrave në publik.
Ylli i “Jerry Maguire” u paraqit në gjykatë të martën (15 tetor) në Manhattan lidhur me katër akuza kundërvajtëse të prekjes me forcë dhe abuzimit seksual të shkallës së tretë, për të cilat ai u deklarua i pafajshëm, por tani doli se 14 femra kanë bërë padi për shkak të sjelljes së pahijshme kundër fituesit të çmimit “Oscar”.
Cuba, i cili do të kthehet në gjykim më 13 dhjetor, fillimisht u arrestua dhe u akuzua për prekjen e gjoksit të një gruaje në barin “Bagic Hour Rooftop” në New York më 9 qershor, shkruan KOHA Ditore. Ai u akuzua nga një juri e madhe për dy akuza në lidhje me incidentin, plus dy akuza që lidhen me një incident të dytë, pasi dyshohet se e kishte pickuar prapanicën e një gruaje në klubin e natës TAO në qytet në vitin 2018.
Prokurorët në këtë rast raportohet se planifikojnë t’i thërrasin edhe 12 femra të tjera për të dëshmuar në mbështetje të akuzave.
"Sjellja e kaluar e të pandehurit tregon se ai në mënyrë rutinore afrohet tek femrat ndërsa ndodhet në bare ose klube të natës, me të cilat ai ka pak ose fare komunikim paraprak, dhe i prek ato në mënyrë të pahijshme", tha ndihmës-prokurorja e Qarkut, Jenna Long.
Avokati i Cuba, Mark Heller, këmbëngul se klienti i tij do të shfajësohet në gjykim, ndërsa duke folur para gazetarëve jashtë gjykatës të martën, ai tha: "Jemi plotësisht të sigurt se nuk do të ketë asnjë dënim penal për Cuba Gooding Jr. Cuba Gooding sigurisht që është i pafajshëm për pretendimet që do të paraqiten para gjykatës dhe ne do të kërkojmë që gjykata ta dërgojë këtë çështje për gjykim".
-
17 tetor 2019 08:08
-
Shpërndaje në: