Showbiz

Nga e hëna, “Express Summer” në KTV

E hëna shënon fillimin e skemës verore në Kohavision. Kësisoj, në kuadër të skemës programore të këtij kanali, për shikuesit do të vijë edhe formati veror i emisionit “Express”, që sjell të dhëna për fushën e kulturës, showbizit e shumë të tjera.

Nën titullin “Express Summer”, në ditët e verës, ky emision nuk transmetohet në terminin e zakonshëm pasditeve në 16:30, mirëpo çdo mbrëmje nga e hëna deri të premten në orën 20:00.

Për fiks 90 minuta sa zgjat “Express Summer”, ekipi i këtij emisioni do të sjellë në ekranet e shikuesve të vet plot argëtim me muzikë, materiale të realizuara nga terreni, lidhje direkte nga qytete të ndryshme të Kosovës.

Emisioni do të udhëhiqet nga Shpend Lipa dhe Rida Gërdovci e atyre në krah do t’u dalë edhe gazetarja dhe prezantuesja e njohur e ekranit të KTV-së, Ana Rustemi.

“Express Summer” do të vijë edhe me rubrika interaktive përmes së cilave do të jetë edhe më afër shikuesve të vet.

Reportazhe nga pishina të ndryshme nëpër Kosovë, po ashtu reportazhe nga riviera e Shqipërisë dhe Malit të Zi, janë pjesë e programit veror. Po ashtu nuk do të mungojnë as të ftuar në studion e “Express Summer”, e cila këtë herë është pozicionuar në ambientet e lokalit më të ri në Prishtinë "Stepia D'ARRA”.

Krejt këto vijnë për çdo ditë nga e hëna deri të premten, me fillim në orën 20:00.