Komisioni Evropian pritet të propozojë ndalimin e krijimit të llogarive në rrjetet sociale për fëmijët nën 15 vjeç pa miratimin e prindërve.
Drafti i ri parashikon gjithashtu rregulla më të rrepta për sigurinë e të miturve në platformat online, videolojërat dhe chatbotet me inteligjencë artificiale.
Komisioni Evropian pritet të prezantojë një propozim të ri legjislativ për mbrojtjen e fëmijëve në internet, i cili synon të kufizojë qasjen e të miturve në rrjetet sociale dhe të vendosë detyrime të reja për kompanitë teknologjike.
Sipas një dokumenti konfidencial të siguruar nga Euronews, fëmijët nën moshën 15 vjeç nuk do të mund të krijojnë llogari në platformat e rrjeteve sociale, si Instagram, TikTok dhe YouTube, pa miratimin e prindërve.
Propozimi, i njohur si “EU Kids Act”, pritet të publikohet të enjten. Presidentja e Komisionit Evropian, Ursula von der Leyen, pritet ta prezantojë paraprakisht nismën gjatë fjalimit të saj për Gjendjen e Bashkimit Evropian në Parlamentin Evropian.
Drafti parashikon një qasje të shkallëzuar në varësi të moshës së fëmijëve.
Fëmijët nën 3 vjeç do të ndalohen plotësisht nga përdorimi i rrjeteve sociale dhe shërbimeve të tjera online të konsideruara me rrezik të lartë.
Për grupmoshën 3 deri në 13 vjeç, do të lejohen vetëm shërbime të përshtatura për fëmijë dhe nën mbikëqyrjen e të rriturve.
Ndërsa të rinjtë 13 deri në 15 vjeç do të mund të kenë qasje të kufizuar në rrjetet sociale me funksione të reduktuara dhe nën kontrollin prindëror.
Për moshën 15 deri në 18 vjeç, nuk parashikohet miratim prindëror për qasje, por kompanitë do të vazhdojnë të jenë të detyruara të zbatojnë rregullat e sigurisë të përshtatura për të miturit.
Kompanitë teknologjike, përfshirë platformat e mëdha si Meta dhe Google, do të duhet të verifikojnë moshën e përdoruesve gjatë hapjes së llogarive të reja. Për këtë qëllim mund të përdoret një aplikacion evropian për verifikimin e moshës ose zgjidhje kombëtare që përcaktojnë vetëm nëse një përdorues është mbi një moshë të caktuar.
Një pjesë e rëndësishme e propozimit lidhet me mënyrën se si janë dizajnuar platformat online.
Drafti synon të ndalojë ose kufizojë elemente të dizajnit që mund të nxisin përdorimin e vazhdueshëm nga të miturit, përfshirë lëvizjen pa fund të përmbajtjes, njoftimet artificiale dhe mekanizma të caktuar shpërblyes.