Поранешниот тренер на Лацио, Свен Горан Ериксон, откри дека му е дијагностициран рак и дека има уште нешто повеќе од една година живот, иако се обидува да остане позитивен.
75-годишниот Швеѓанец уживаше успеси како тренер во Италија во текот на 1990-тите, каде беше тренер на Сампдорија, а потоа и Лацио, тимот со кој ја освои шампионската титула во сезоната 1999/2000.
Неодамна, Ериксон работеше како спортски директор во шведскиот третолигаш ИФ Карлштад, но во февруари минатата година поднесе оставка поради здравствени причини.
„Сите знаеја дека не сум добро и на крајот беше откриено дека имам рак. Морам да се борам колку што можам и во најдобар случај имам уште една или повеќе година да живеам“, рече меѓу другото Ериксон.
Во текот на својата тренерска кариера, Ериксон работеше и во Фиорентина и Рома, додека вкупно запиша 437 натпревари во Серија А. Беше и во Бенфика, Манчестер Сити, Лестер и неколку кинески тимови. Беше селектор на Англија, Мексико, Брегот на Слоновата Коска и Филипини.
