Sylvester Stallone ka folur hapur për betejën e tij me buliminë dhe përdorimin e steroideve, duke treguar se në fillimet e karrierës ishte bërë i fiksuar pas pamjes së tij fizike.
Ylli i “Rocky” ka rrëfyer se dëshironte të kishte një trup “shumë fleksibël dhe atletik”, por obsesioni me fizikun arriti deri aty sa ai filloi të kishte probleme me ushqimin, duke u përpjekur të qëndronte sa më i dobët.
Në një intervistë për The New York Times, Stallone tha se synonte një trup më të ngjashëm me atë të një “jaguari” apo “maceje”, në vend të një fiziku të madh si ai i Arnold Schwarzenegger.
“U bë një obsesion. Shumë i keq. Arriti deri në pikën që u bëra bulimik”, ka thënë aktori.
Stallone tregoi se gjatë xhirimeve të “Rocky III”, në vitin 1982, kishte arritur në rreth 2.6 për qind yndyrë trupore, ndërsa pranoi se në atë periudhë ishte aq i përqendruar te forma fizike sa kishte vështirësi të mbante ushqimin.
Aktori 80-vjeçar foli gjithashtu për përdorimin e steroideve, duke pranuar se kishte përdorur hormone sintetike dhe duke argumentuar se arritja e një niveli të caktuar të formës fizike pa përdorimin e substancave të tilla është shumë e vështirë.
Ai tha se përdorimi i tyre duhej bërë në mënyrë të kontrolluar, duke përmendur periudha gjashtëjavore përdorimi dhe gjashtëjavore pushimi.
Megjithatë, Stallone pranoi se përdorimi i hormoneve sintetike “i mori një taksë të tmerrshme” trupit të tij.
Aktori tha se një moment çlirimi nga presioni për të pasur një fizik të caktuar erdhi gjatë filmit “Cop Land”, në vitin 1997, ku luajti një personazh mbipeshë dhe me dëgjim të dëmtuar.
Stallone pranoi gjithashtu se ndër vite e ka “keqtrajtuar” trupin e tij, duke bërë të ditur se ka kryer nëntë ndërhyrje kirurgjikale në shpinë, dy në shpatull dhe tri ndërhyrje në qafë.
“Gjithçka mbahet bashkë me tela, por ende dua të qëndroj në formë”, tha ai, duke shtuar se dëmi fizik ka ardhur me një çmim shumë të lartë.
Duke reflektuar për karrierën e tij, Stallone tha se, po të kishte mundësinë ta bënte gjithçka nga e para, do t’i thoshte vetes: “Lëre dikë tjetër ta mbajë barrën dhe mos i bëj vetë skenat e rrezikshme.”