Modelja 52-vjeçare ngriti një padi për shpifje ndaj Netflixit në qershor, duke pretenduar se ka përjetuar “vuajtje të konsiderueshme mendore” për shkak të mënyrës se si është portretizuar në dokumentarin Reality Check: Inside America’s Next Top Model. Ajo akuzoi producentët se kishin përdorur vetëm 16 minuta nga një intervistë tre orë e gjysmë me të, duke i paraqitur fragmentet të “shkëputura nga konteksti dhe të ribashkuara për të mbështetur një narrativë të rreme dhe shpifëse, që nuk kishte lidhje me atë që ajo kishte shprehur në të vërtetë”.
Të premten, më 14 gusht 2026, Netflix dorëzoi dokumentet në gjykatë, duke kërkuar rrëzimin e pretendimeve të saj. Një zëdhënës i platformës tha për Us Weekly: “Regjisorët Daniel Sivan dhe Mor Loushy janë autorë të dokumentarëve të respektuar, të cilët intervistuan në mënyrë të plotë personat që qëndrojnë pas America’s Next Top Model. Tyra Banks iu dha mundësia të fliste hapur për përvojën e saj dhe krijuesit e paraqitën në mënyrë të drejtë këndvështrimin e saj, krahas atyre të çdo pjesëmarrësi tjetër të përfshirë në këtë dokumentar. Ne qëndrojmë pas Reality Check: Inside America’s Next Top Model dhe do të vazhdojmë ta mbrojmë fuqishëm atë.”
Pas paraqitjes së kërkesës në gjykatë, Tyra i kërkoi Netflixit të publikojë versionin e plotë dhe të paedituar të intervistës së saj, pasi e ka akuzuar platformën për shtrembërim të së vërtetës. Avokatët e saj, Tom Locke dhe Clare Locke, thanë në një deklaratë: “Padia e Tyra-s ngre një pyetje të thjeshtë: a mund t’u besojnë shikuesit që një dokumentar i paraqitur si fakt e përfaqëson në mënyrë të drejtë atë që ka ndodhur dhe atë që njerëzit kanë thënë në të vërtetë? Përgjigjja e Netflixit vetëm sa e thekson këtë çështje. Netflix i referohet montazhit të programeve reality për të mbrojtur mënyrën se si është montuar ky dokumentar. Askush nuk e kundërshton faktin se dokumentarët montohen. Pyetja është nëse këto montazhe e kanë shtrembëruar në mënyrë thelbësore të vërtetën.”
Avokatët shtuan se Netflix e ka intervistën e plotë dhe të paedituar të Tyra-s. “Nëse Netflix qëndron pas saktësisë së dokumentarit të tij, duhet ta publikojë intervistën e plotë dhe t’i lejojë shikuesit të gjykojnë vetë. Le të krahasojë publiku atë që Tyra tha në të vërtetë me atë që Netflix zgjodhi të transmetojë. Faktet janë fakte dhe, në këtë rast, faktet janë të regjistruara dhe po fshihen nga Netflix”, thanë ata.
Në padinë e saj, Tyra pretendon se dokumentari përmban “dramë të sajuar” dhe “narrativa të ndërtuara”.
Dokumentet e gjykatës, të siguruara nga revista People, thonë se seriali Reality Check: Inside America’s Next Top Model iu prezantua publikut si një “serial dokumentar”, ndërsa Netflix e cilësoi atë si “kronikën përfundimtare, që duhet parë patjetër, të America’s Next Top Model”. Sipas padisë, kjo është e rëndësishme sepse shikuesit e një dokumentari nuk presin “dramë të sajuar apo narrativa të ndërtuara”, por presin fakte.
