Советник за зависност од дрога осуден на две години затвор во случајот со смртта на Метју Пери

Советник за зависности од дрога е осуден на две години затвор во врска со смртта од предозирање на актерот од „Пријатели“ Метју Пери, објавија медиумите. БиБиСи.

Ерик Флеминг, еден од петте лица обвинети во врска со смртта на актерот, беше прогласен за виновен за набавка на хируршки анестетик кетамин од жена од Лос Анџелес позната како „Кралица на кетамин“, а потоа и за доставување до Пери. 56-годишниот консултант се изјасни за виновен во август 2024 година за дистрибуција на кетамин.

Федералниот судија го осуди Флеминг на две години затвор, три години надзор по ослободувањето и парична казна од 200 долари.

Пери беше пронајден мртов во својот дом во Јужна Калифорнија во октомври 2023 година. Властите утврдија дека причина за смртта се акутните ефекти на кетамин.

Обвинителите побараа Флеминг да биде осуден на две и пол години затвор, додека неговите адвокати побараа полесна казна: три месеци затвор и девет месеци лекување во центар за рехабилитација од зависности.

Според Асошиејтед Прес, Флеминг  ѝ рекол на судијката Шерилин Пис Гарнет за време на судското рочиште дека тоа е навистина кошмар од кој не може да се разбуди.

„Ме прогонуваат грешките што ги направив“, рече тој.

Во судските документи поднесени пред изрекувањето на пресудата, неговите адвокати рекоа дека Флеминг вложил „екстремни напори да се покае за своите криминални дела“.

„Ја направив најголемата грешка во мојот живот и длабоко ми е жал за болката што ја предизвикав“, напиша Флеминг во писмо до судијата во април.

Тој додаде дека бил „преплавен од тага и срам“ кога дознал за смртта на Пери, признавајќи дека му го обезбедил кетаминот на актерот затоа што сакал пари и мислел дека му прави услуга на пријател.

Флеминг се извини за она што го нарече „неоправдано однесување“ и рече дека ја презема целосната одговорност за своите криминални дејствија.

„Се надевам дека мојата казна ќе донесе правда и мир за сите што го сакаа Мет“, напиша тој.

Флеминг е еден од петте лица, вклучувајќи ги лекарите и личниот асистент на актерот, кои, според американските власти, го снабдувале Пери со кетамин и ја искористиле неговата зависност од дрогата за финансиска добивка, што довело до неговата смрт од предозирање.

Тој е четвртото лице осудено во случајот. Сите вклучени се изјаснија за виновни во федералната постапка.

Минатиот месец, 42-годишната Јасвин Санга, позната како „Кралицата на кетаминот“, беше осудена на 15 години затвор за продажба на дрогата што доведе до смртта на актерот.

Во меѓувреме, докторот Салвадор Пласенсија, кој му обезбедувал на актерот кетамин во неделите пред неговата смрт, беше осуден на 30 месеци затвор.

Друг калифорниски лекар, Марк Чавез, беше осуден на осум месеци домашен притвор и три години надзор.

Во меѓувреме, се очекува Кенет Ивамаса, личниот асистент на Пери, обвинет за инјектирање кетамин на актерот, да биде осуден на 27 мај, откако се изјасни за виновен за заговор за дистрибуција на кетамин што предизвикало смрт.