Црна Гора законски го признава правото на отсуство за жени со „болни менструални циклуси“

Пратениците во Собранието на Црна Гора ги одобрија потребните измени на Законот за здравствено осигурување, со кои на жените им се дава право на два дена платен одмор месечно доколку им се дијагностицираат здравствени нарушувања што предизвикуваат болни менструални циклуси.

Целта на промените, според образложението на законот, е да се воспостави рамнотежа помеѓу здравјето на жените и нивните професионални обврски.

Ова право им припаѓа на жените кои страдаат од секундарна дисменореа, т.е. болни менструални циклуси предизвикани од органски причини, како што се ендометриоза, полипи, фиброиди и други слични состојби.

Иницијативата за измена на законот ја презентираше независната пратеничка Јевросима Пејовиќ во март оваа година, во пресрет на Меѓународниот ден на жената.

Предлог-законот, кој предвидува право на менструално отсуство за жени со дијагностицирана секундарна дисменореа, доби едногласна поддршка од Комисијата за здравство, труд и социјална политика, како и од Законодавно-правната комисија.

Дијагнозата за секундарна дисменореја ја утврдува лекар специјалист, додека осигурените жени се должни да го обноват лекарското уверение најдоцна до 31 декември во тековната година и да го достават до работодавачот до 30 јануари следната година.

исто така LIFESTYLE 9 јуни 2026 година Како да знам дали сум влегла во фаза пред менопауза?

Во образложението за предлог-законот се наведува дека предлогот за измена на Законот за задолжително здравствено осигурување има за цел соодветно да ги регулира дијагностицираните патолошки состојби на секундарна дисменореја, елиминирајќи ги сите форми на предрасуди на работното место и создавајќи рамнотежа помеѓу здравјето на жените и нивните професионални обврски.

„Предложеното законско решение го признава правото на жените со секундарна дисменореја на посебен статус на привремена неспособност за работа. Секундарната дисменореја е состојба придружена со болни симптоми предизвикани од претходно дијагностицирана гинеколошка патологија. Овој посебен статус на привремена неспособност за работа ќе се смета за медицинско отсуство, во кое жената може да се најде поради секундарна дисменореја поврзана со патолошки состојби како што се ендометриоза, фиброиди, воспаление на јајниците, ендометријални полипи, полицистични јајници или симптоми како што се болка при сексуален однос (диспареунија), болка при мокрење (дизурија), неплодност или посилно крварење од нормалното“, се наведува, меѓу другото, во образложението за законот.