Црногорската полиција ги зголеми безбедносните мерки против поранешниот претседател на Црна Гора, Мило Ѓукановиќ, по информациите дека против него се подготвува атентат.
Ова стана познато на 14 јули, откако ден претходно некои медиуми во Црна Гора, кои повикувајќи се на извори од безбедносниот сектор, објавија дека криминална група од регионот се подготвувала да го убие Ѓукановиќ и дека поранешниот претседател на Црна Гора бил информиран за тоа од неидентификуван припадник на странските служби.
„Полицијата ги доби соодветните информации од Агенцијата за национална безбедност [АНБ]. Нагласуваме дека веродостојноста на информациите се уште се проверува од страна на АНБ. Полицијата, Обвинителството и АНБ веднаш по добивањето на информацијата синхронизирано презедоа понатамошни мерки и дејствија во нивна надлежност“, се наведува во полициското соопштение.
Надлежните велат дека веднаш по добивањето на информацијата, поведен е предмет од надлежното обвинителство.
Претседателот на опозициската Демократска партија на социјалистите, Данијел Живковиќ, е единствениот кој официјално објави дека оваа партија „знае за деталите од подготовката за можниот атентат на поранешниот претседател на Црна Гора, Мило Ѓукановиќ“.
Така тој изјави на прес-конференција на 13 јули, одговарајќи на новинарско прашање за медиумските информации дека се подготвува атентат врз Ѓукановиќ.
„Имаме сознанија за деталите и знаеме за што се работи. Не е наше да ги соопштиме нашите информации. Верувам дека АНБ и другите надлежни институции ќе излезат со точни податоци“, рече Живковиќ.
Повикувајќи се на неофицијални информации објавени од медиумите, Живковиќ изјави дека Ѓукановиќ за ова бил предупреден од кругови на странски разузнавачки агенции, но не сакал да даде детали.
Повикувајќи се на неидентификувани извори, дел од медиумите во Црна Гора добија потврда дека АНБ добила „оперативни информации“ за подготовка на убиството на Ѓукановиќ.
Во оваа прилика, Радио Слободна Европа ја праша АНБ дали добила „сериозни оперативни информации дека организирана криминална група се подготвува да го убие Ѓукановиќ“, како што пренесуваат медиумите. Оваа институција не одговори.
РЕЛ испрати и прашање до кабинетот на поранешниот претседател дали е вистина дека ги известил надлежните органи за информацијата дека се подготвува атентат. Ниту од таа адреса нема одговор.
Во првото полициско соопштение дадено на 13 јули таа изјави дека не знаела за информациите за подготовка на атентатот на Ѓукановиќ.
Полицијата во последното соопштение појасни дека во времето на објавите во медиумите за подготовка на атентатот „АНБ соработувала на меѓународен план за проверка на таа информација“. /REL
