ЕУ ја повика Србија да не ги зајакнува врските со Русија

Европската унија го повтори својот повик до Србија – како земја кандидат за членство – да го усогласи својот надворешнополитички став со оној на ЕУ и да избегне чекори што се во спротивност со овие ставови.

Според дипломатите на ЕУ, ова барање е особено актуелно во однос на позициите кон Русија, против која ЕУ продолжува да воведува санкции поради војната во Украина, додека Србија продолжува да негува пријателски односи со Русија.

Портпаролот на ЕУ, осврнувајќи се на неодамнешната посета на српскиот министер за надворешни работи Марко Ѓуриќ на Москва и неговата средба со рускиот министер за надворешни работи Сергеј Лавров, рече дека ЕУ презела чекори за изолација на Русија, ги сведе контактите на минимум, а исто така подготвува нов пакет санкции, па затоа очекува Србија како земја кандидат да не презема чекори против оваа политика на Европската унија.

„Србија, како земја кандидат, мора да ги зголеми напорите да се прилагоди на надворешната политика на ЕУ како прашање од висок приоритет. „Затоа треба да се воздржи од дејствија или изјави кои се спротивни на надворешнополитичките позиции на ЕУ“, рече портпаролот на ЕУ.

Во меѓувреме, дипломати од повеќе земји-членки изјавија дека, покрај недостатокот на напредок во процесот на нормализирање на односите со Косово, прашањата за владеење на правото, блиската соработка на Србија со Русија има ефект да го спречи отворањето на неколку преговарачки поглавја во процесот на преговорите за членство на Србија во ЕУ, иако Србија, според Европската комисија, ги исполнила техничките услови за тоа. /REL