Ushtrimet fizike mund të ndihmojnë në lehtësimin e dhimbjeve akute dhe kronike dhe, në disa raste, efekti i tyre mund të jetë i krahasueshëm me atë të disa barnave kundër dhimbjes, sipas një studimi të ri nga Universiteti Adelaide.
Nga pilates deri te forma të tjera të aktivitetit fizik mund të kenë ndikim në uljen e dhimbjes. Studiuesit arritën në këtë përfundim pas analizimit të 157 rishikimeve sistematike, të cilat përfshinin më shumë se 220 mijë pjesëmarrës.
“Në një kohë kur po kërkojmë mënyra të sigurta dhe efektive për menaxhimin e dhimbjes përtej medikamenteve, këto gjetje ofrojnë dëshmi të forta për ta bërë ushtrimin pjesë më rutinë të trajtimit të dhimbjes”, tha Carol Maher, hulumtuese e lartë në Universitetin Adelaide.
Studiuesit vunë re gjithashtu se ushtrimet me intensitet të ulët dhanë rezultate më të mira për lehtësimin e dhimbjes sesa aktivitetet me intensitet mesatar ose të lartë.
Programet më të shkurtra, rreth 12 javë, shfaqën gjithashtu efekte më të mëdha sesa programet më të gjata. Ndërsa programet që përfshinin më pak se 120 minuta ushtrime në javë rezultuan më efektive sesa ato me kohëzgjatje më të madhe javore.
“Më shumë ushtrime nuk do të thotë domosdoshmërisht më mirë”, tha Ben Singh, autori kryesor i studimit.
Sipas tij, programet me kohëzgjatje më të shkurtër dhe intensitet më të ulët mund të sjellin reduktime më të mëdha të dhimbjes.
Si ndikon aktiviteti fizik në dhimbje?
Studiuesit shpjegojnë se gjatë aktivitetit fizik trupi çliron substanca, përfshirë endorfinat dhe serotoninën, të cilat mund të ndikojnë në mënyrën se si truri e percepton dhimbjen dhe të rrisin tolerancën ndaj saj.
Ushtrimet mund të ndihmojnë gjithashtu në uljen e inflamacionit dhe në ndryshimin e mënyrës se si truri reagon ndaj sinjaleve të dhimbjes.
Përveç kësaj, aktiviteti fizik mund të përmirësojë humorin, faktor që mund të ndikojë në përjetimin e dhimbjes.
Megjithatë, studiuesit theksojnë se ushtrimet fizike ende nuk përdoren në mënyrë të mjaftueshme si pjesë e trajtimit të dhimbjes. Në shumë raste, pacientëve u këshillohet vetëm që “të qëndrojnë aktivë”, pa iu ofruar një program specifik që përcakton llojin e ushtrimeve, intensitetin dhe kohëzgjatjen.
Sipas autorëve, profesionistët shëndetësorë kanë nevojë për udhëzime më të qarta se cilat forma të ushtrimeve janë më të përshtatshme për pacientë të ndryshëm dhe si duhet të përcaktohet një program individual.
Studiuesit paralajmërojnë, megjithatë, se ushtrimet nuk duhet të konsiderohen si zgjidhje universale për çdo lloj dhimbjeje dhe as të pritet që ato ta eliminojnë plotësisht atë.
Efekti mund të ndryshojë në varësi të shkakut të dhimbjes, gjendjes fizike të personit dhe përkushtimit ndaj programit të ushtrimeve.