-
Превод: Вита Абраши-Кајтази
- 17 март 2025 година 15:08 часот
- Споделете на:
Едно ново истражување покажа дека мајмуните заразени со смртоносниот вирус ебола може да се излечат со апче, што би можело да го отвори патот за полесни и подостапни третмани за луѓето.
Еболата, за прв пат идентификувана во 1976 година и за која постои сомневање дека е пренесена од лилјаци, е вирусна болест која се шири преку директен контакт со телесни течности, предизвикувајќи внатрешно крварење и откажување на органите.
Досега, напорите за негово лекување наидоа на тешкотии, главно поради недостаток на финансиски стимулации за фармацевтските компании, бидејќи епидемијата на вирусот се јавува главно во субсахарска Африка. Понатаму, ретката и непредвидлива природа на епидемии го отежнува спроведувањето на клиничките студии, објави Медикал Икспрес.
Вакцината беше широко одобрена само во 2019 година, додека два третмани со интравенски антитела покажаа ефикасност, но бараат складирање на ниски температури и тешко се администрираат во најсиромашните области во светот.
Лесен за употреба третман
„Се обидуваме да развиеме попрактичен, поедноставен за употреба третман кој може да помогне во спречување, контрола и задржување на епидемии“, изјави за АФП Томас Гајзберт, виролог на Универзитетот во Тексас во Галвстон и водач на студијата објавена во Science Advances.
За нивниот експеримент, Гајзберт и неговиот тим го тестирале антивирусниот лек Обелдесивир, орална верзија на интравенозниот Ремдесивир, првично развиен за вирусот СОВИД-19. Обелдесивир е „инхибитор на полимераза“, што значи дека го блокира ензимот суштински за вирусна репликација.
Ветувачки резултати
Тимот зарази два вида мајмуни, резус и циномолгус макаки, со висока доза на варијантата макаки на вирусот ебола.
Еден ден по изложувањето, десет мајмуни земале пилула Обелдесивир секој ден во текот на десет дена, додека три мајмуни од контролната група не добиле третман и умреле.
Резултатите беа ветувачки: 80% од мајмуните циномолгус и 100% од мајмуните резус преживеаја. Третираните мајмуни не само што го исчистиле вирусот од нивната крв, туку развиле и имунолошки одговор, создавајќи антитела и избегнувајќи оштетување на органите.
Голем чекор напред во лекувањето на еболата
Гајзберт објасни дека, иако бројот на тестирани мајмуни бил мал, статистичката моќ на студијата била голема, бидејќи тие биле изложени на екстремно висока доза на вирусот - околу 30,000 пати поголема од смртоносната доза за луѓето. Оваа методологија помогна да се намали бројот на животни жртвувани за истражувачки цели.
Еден од најимпресивните аспекти на Обелдесивир е неговата способност да обезбеди заштита со широк спектар, во споредба со постоечките третмани со антитела, кои делуваат само против заирскиот вид на вирусот ебола.
„Ова е огромна предност“, нагласи Гајзберт.
Во моментов, фармацевтската компанија Гилеад го унапредува Обелдесивир во втората фаза од клиничките испитувања за вирусот Марбург, кој е сличен на еболата.
Гајзберт, исто така, ја истакна важноста на финансирањето од Националниот институт за здравство на САД, особено сега кога некои грантови се откажани.
„Сите овие лекови и вакцини кои се развиени против ебола и други егзотични вируси - 90% од финансирањето доаѓа од американската влада. „Мислам дека пошироката јавност би се согласила дека ни требаат третмани за ебола“, рече тој.
