Вклучувањето во уметноста и културата може да го забави стареењето

Нова студија покажа дека занимавањето со уметност и култура може да го забави биолошкото стареење на телото, имајќи сличен ефект како и физичката активност.

Со години, главниот совет за подолг живот беше здравата исхрана и вежбањето. Но, истражувачите сега велат дека уметноста може да игра важна улога и во одржувањето на здравјето и биолошката младост, објави списанието „Нејчр“. НПР.

Истражувачката Дејзи Фанкорт од Универзитетскиот колеџ во Лондон и нејзиниот тим анализирале податоци од илјадници луѓе, од оние кои се многу вклучени во уметноста до оние кои речиси и да немаат никаков контакт со неа.

„Во оваа студија, откривме дека ангажирањето во уметноста е поврзано со 4% побавна стапка на стареење, што значи дека луѓето биле биолошки околу една година помлади ако редовно се занимавале со уметност“, рече таа.

Според неа, овој ефект бил речиси ист како оној забележан со физичка активност.

Студијата, објавена во „Иновација во стареењето“, покажа дека придобивките важат и за луѓето кои создаваат уметност, како што се танцување, пеење или сликање, и за оние кои едноставно консумираат култура, како што е одењето на концерти, театар или музеи.

Научникот Стивен Хорват од Универзитетот во Калифорнија, Лос Анџелес, познат како творец на „епигенетскиот часовник“, изјави дека резултатите од студијата го изненадиле.

„Искрено, ова многу ме изненади“, рече тој.

„Епигенетскиот часовник“ е метод што се користи за мерење на човечката биолошка возраст преку промени во ДНК-та.

Хорват објасни дека хронолошката возраст е вистинската возраст според изводот од матичната книга на родените, но не сите луѓе стареат со иста брзина.

„Мислам дека ова е многу ригорозна студија. А она што е сосема ново за мене е тоа што занимавањето со уметност може да има ефекти споредливи со физичката активност. Мислам дека оваа студија ја носи областа на епигенетското мерење на времето на нови хоризонти“, рече тој.

Кардиологот Даг Вон од Универзитетот Нортвестерн, исто така, изјави дека креативните активности можат да помогнат во намалувањето на стресот и воспалението во телото, што може да помогне во забавување на стареењето.

„Уметноста, креативноста или уживањето во уметноста е нефармацевтска интервенција“, рече тој.