Музејот Лувр и неколку париски галерии привремено се затвораат

Muzeu “Louvre” u mbyll përkohësisht të hënën për shkak të rreth 50 studentëve të arteve dhe kulturës që po protestonin dhe që bllokuan hyrjen përmes piramidës së tij prej xhami. Aksioni i tyre vjen në përvjetorin e parë të vjedhjes së bujshme të stolive në të njëjtin muze dhe pas një proteste masive mbarëkombëtare të shtunën kundër pabarazisë sociale, veçanërisht të dukshme në shkollat publike. Protesta përshkallëzoi në përleshje me policinë dhe trazira, të cilat vazhduan në një shkallë më të vogël edhe të dielën në mbrëmje.

Trazirat kanë ndodhur në prag të panairit “Art Basel Paris”, që mbahet këtë javë, duke nxitur shqetësime për ndikimin që mund të kenë në një javë të mbushur me ngjarje artistike në të gjithë qytetin. Është ende herët të dihet nëse protestat do të vazhdojnë gjatë ditëve në vijim, por banorët shpresojnë se pushimet shkollore do të ndihmojnë në qetësimin e tensioneve.

Në përgjigje të situatës, “Art Basel” publikoi të dielën një deklaratë, duke i siguruar vizitorët se “panairi po zhvillohet sipas planifikimit” dhe se “personel shtesë i sigurisë është angazhuar për të patrulluar perimetrin e panairit 24 orë në ditë”. Kjo masë synon t’u shtohet atyre që panairi i përshkroi si “protokolle të gjera tashmë në fuqi”, për të garantuar “sigurinë e të gjithë mysafirëve, ekspozuesve dhe stafit, si dhe sigurinë e veprave të artit”.

Këto masa përfshijnë barriera kundër automjeteve që mund të përdoren për sulme, të vendosura përreth “Grand Palais”, si dhe “protokolle të rrepta të kontrollit të sigurisë” për vizitorët. Panairi theksoi gjithashtu se bashkëpunon me një kompani private të sigurisë dhe, kur është e nevojshme, me policinë e Parisit.

Ndërkohë, gjatë fundjavës, shumica e hapjeve të ekspozitave të artit u zhvilluan sipas planifikimit, pavarësisht vështirësive shtesë për të lëvizur nëpër qytet, për shkak të rrugëve dhe linjave të metrosë të mbyllura, si dhe përleshjeve mes policisë dhe protestuesve. Shumë kalimtarë u gjendën mes tymit të barrikadave të rrugëve të përfshira nga flakët dhe gazit lotsjellës. Si pasojë, thanë disa burime, shumë vizitorë që do të qëndrojnë në qytet këtë javë po marrin vetura me qira, ndërsa disa të tjerë kanë anuluar rezervimet e hoteleve.

Disa hapësira arti i mbyllën përkohësisht dyert. Hapja e ekspozitës “Parallax” të artistit Stan Douglas, e planifikuar për të dielën në “Jeu de Paume”, u anulua “si masë paraprake”. Një zëdhënës i muzeut ka treguar se vendimi u mor edhe për shkak se kopshtet përreth, “Tuileries”, ishin mbyllur për të njëjtën arsye. Edhe galeria “Hauser & Wirth” e mbylli hapësirën e saj në lagjen e tetë të Parisit të shtunën, “si masë paraprake për të mbrojtur ekipin, vizitorët dhe stafin”, tregoi një përfaqësues.
Në galerinë “Marian Goodman”, në lagjen “Marais”, ku u hap një ekspozitë me një film të ri nga Bruce Nauman dhe Tacita Dean, shumica e të pranishmëve arritën të kalonin “përmes barrikadave”, pavarësisht se iu desh të merrnin frymë në gazin lotsjellës për të marrë pjesë në darkën e hapjes. Gjatë saj, Dean i falënderoi të gjithë për pjesëmarrjen. Më vonë atë natë, u panë njerëz që po dilnin me vrap nga dyqanet në rrugën “Rue du Temple”, në lagjen “Marais”, me krahët e mbushur me mallra të vjedhura.

Sipas autoriteteve, mijëra dyqane në Francë u plaçkitën gjatë protestave dhe pas tyre, të cilat mblodhën mbi 500 mijë njerëz në qendrat e qyteteve anembanë vendit. Ndërtesa publike, përfshirë një objekt bashkie të shekullit XIX në Limoges, u dëmtuan rëndë nga zjarret, ndërsa afro 2 mijë e 400 persona u arrestuan.

Ministri i Brendshëm i Francës pranoi se policia kishte “humbur kontrollin” në disa zona dhe ofroi dorëheqjen. Megjithatë, presidenti francez, Emmanuel Macron, nuk e pranoi dorëheqjen dhe premtoi masa të shpejta kundër plaçkitësve, si dhe një rishikim të “metodave operacionale” të reja të sigurisë. Kryeministri Sébastien Lecornu njoftoi se, kur të jetë e nevojshme, mund të vendosen orare kufizuese të lëvizjes, duke filluar që nga e hëna në mbrëmje, për të mbrojtur dyqanet. Pritet që hollësi të tjera për këto masa të bëhen të ditura më vonë gjatë ditës.

Sipas raportimeve, “Louvre” nuk pësoi dëme dhe protestuesit nuk arritën të hynin përmes piramidës prej xhami. Në faqen e internetit të muzeut thuhej se “për shkak të grevave të studentëve, muzeu aktualisht është i mbyllur”. Sipas agjencisë “AFP”, protestuesit në “Louvre”, mes tyre edhe studentë të shkollave të artit, siç është “École du Louvre”, e lidhur me muzeun, thanë se ishin të zemëruar me reagimin e dhunshëm të policisë ndaj protestuesve gjatë javëve të fundit. Ata dëshironin të shprehnin mbështetjen për studentët dhe të tjerët që kërkojnë kushte më të mira në shkollat publike dhe masa për përballimin e rritjes së kostos së jetesës.

Në hapjen e ekspozitës së Jenny Holzer në “Musée d’Orsay”, të dielën në mbrëmje, e titulluar “J’ai Vue”, të pranishmit diskutuan për përvojat e tyre gjatë protestave, si dhe për aktualitetin e ekspozitës së Holzerit, e cila trajton drejtpërdrejt konfliktet globale. Holzer nuk mundi të merrte pjesë fizikisht, pasi nuk ishte mirë me shëndet.

Artistja Kendalle Getty tha se përgatitja e ekspozitës së saj të re, të titulluar “L’Identification Avec L’Autre”, në rrugën “Rue Bleue”, në lagjen e nëntë të Parisit, kishte qenë sfiduese për shkak të ndërprerjeve të vazhdueshme gjatë javëve të protestave studentore. Tani ajo druhet gjithashtu se veprat e saj në përmasa të mëdha, të realizuara me pasqyra dhe të frymëzuara nga “Galeria e Pasqyrave” në Versajë, mund të rrezikohen nga dëmtimet që mund të shkaktojnë plaçkitësit.
Shauna Torres, e cila e instaloi dhe e organizoi ekspozitën e Gettyt, tregoi se të shtunën kishte mbetur e bllokuar mes gazit lotsjellës, por po përpiqej ta ruante një këndvështrim pozitiv.

“Po jetojmë historinë dhe ndonjëherë ajo mban erë zjarri, gazi lotsjellës dhe shampanje, por jam thjesht e lumtur që jam këtu”, ka thënë ajo.