Mesfushori Leandro Paredes tha se do të jetë e vështirë të vazhdojë të luajë për Argjentinën, pasi u suspendua për dhjetë ndeshje për përleshjen pas finales së Kupës së Botës. Argjentina e humbi 1:0 finalen nga Spanja, ndërsa pas ndeshjes kishte skena të turpshme. Lojtarët e Spanjës u sulmuan nga argjentinasit, ndërsa Paredes ishte prej figurave kryesore. Ai nuk ka të drejtë të luajë në dhjetë ndeshjet e ardhshme të Argjentinës.
32-vjeçari tha se pensionimi i Lionel Messit nga Argjentina ishte arsye tjetër për të cilën ai do të duhej të shqyrtonte të ardhmen ndërkombëtare.
FIFA vendosi në gusht për dënimet për skenat e turpshme pas finales. Derisa lojtarët spanjollë vrapuan për të festuar, kishte shtyrje e goditje ndaj tyre nga argjentinasit. Nuk kanë munguar as provokimet e dyanshme.
Paredes është përballur me tri akuza për sulm, ndërsa bashkëlojtari i tij, Nahuel Molina, me dy. Të dy argjentinasit u gjobitën me nga 90 mijë dollarë po ashtu.
“Do të jetë e vështirë për mua të qëndroj në ekipin përfaqësues”, tha Paredes për mediat argjentinase. “Për shkak të pezullimit dhe për shkak të vendimit të Leos. Do të jetë e vështirë që gjithçka të vazhdojë si më parë. Nuk e kam diskutuar ende me trajnerin Lionel Scaloni, por do të flasim për këtë dhe do të shohim çfarë vendimi do të marr”.
Paredes tha se mungesa e Messit do të ndihet shumë te përfaqësuesja. Superylli të hënën njoftoi për përfundimin e karrierës ndërkombëtare.
“Trashëgimi e Leos do të jetojë përgjithmonë për shkak të asaj që ai arriti, për shkak se nuk u dorëzua kurrë dhe për shkak se tregoi se ëndrrat janë të vështira, ndiqen dhe në fund përmbushen”, shtoi Paredes.
Ai ka treguar se kanë folur me Messin për tërheqjen.
“Kemi folur në ditët e fundit të Kupës së Botës se si finalja me siguri do të ishte ndeshja e tij e fundit. Por megjithatë nuk ishim të përgatitur për këtë, për shkak të asaj që Leo do të thotë për ne”.
Paredes luan për Boca Juniors. Për Argjentinën i ka 84 ndeshje. Në Evropë ka bërë karrierë te Chievo, Roma, Empoli, Zeniti, PSG-ja e Juventusi.