Presidenti ukrainas, Volodymyr Zelensky, po qëndron të enjten në Kanada për bisedime me kryeministrin Mark Carney.
Kjo është vizita e tij më e fundit ndërkombëtare që synon të sigurojë mbështetje për luftën e Ukrainës kundër pushtimit rus.
Ukraina ndodhet nën presion për shkak të luftës ajrore të Rusisë, e cila përdor raketa balistike dhe dronë me motorë reaktivë për të depërtuar në mbrojtjen e vendit. Sipas zyrtarëve ukrainas, sulmet e Moskës kanë pasur në shënjestër rrjetin energjetik të Ukrainës në prag të dimrit, si pjesë e një fushate për të thyer moralin e popullatës civile.
Përpjekjet e fundit të SHBA-së për t'u dhënë fund luftimeve që zgjasin prej më shumë se katër vjetësh nuk kanë sjellë ndonjë përparim të rëndësishëm, megjithëse pritet të vazhdojnë bisedimet e ndërmjetësuara nga Uashingtoni mes delegacioneve të Moskës dhe Kievit.
"Fokusi kryesor do të jetë mbështetja e Ukrainës në mbrojtjen e hapësirës sonë ajrore dhe përgatitja për dimrin”, ka thënë Zelensky në një postim në rrjetet sociale lidhur me vizitën e tij në Kanada.
"Ne do të diskutojmë se si të forcojmë qëndrueshmërinë tonë, të mbështesim popullin tonë dhe të sigurojmë që Ukraina të ketë kapacitetet e nevojshme për t'u mbrojtur”, ka shtuar ai.
Mbërritja e Zelenskyt të mërkurën në mbrëmje në Calgary të Albertës ka ndodhur një ditë pasi fluturimi i tij nga Moldavia në Norvegji u vonua, pasi autoritetet mbyllën hapësirën ajrore të Moldavisë për shkak të hyrjes së një droni.
Konflikti ajror me dronë mes Rusisë dhe Ukrainës është intensifikuar që nga fillimi i pushtimit rus në shkallë të gjerë në shkurt të vitit 2022, ndërsa fqinjët e Ukrainës, Rumania dhe Moldavia, kanë raportuar raste të përsëritura të hyrjes së dronëve në hapësirën e tyre ajrore.