Индиското биро за истраги на воздухопловството објави прелиминарен извештај за авионот на „ЕрИндија“ што се урна во јуни.
Авионот што леташе за Лондон едвај ја напуштил пистата на аеродромот во Ахмедабад пред да се сруши назад на земјата. 260 луѓе загинаа, а само еден преживеа.
Прелиминарниот извештај се фокусира на постапките на пилотите. Двата прекинувачи за контрола на горивото – што се користат за гаснење на моторите – биле поставени на позиција што го запира протокот на гориво и предизвикува гаснење на моторите. Ова обично се случува кога авионот го завршува својот лет или кога има итно запирање во случај на дефект.
Според снимките, се слуша како едниот од пилотите го прашува другиот: „Зошто го запревте?“ Другиот, според извештајот, одговара велејќи дека тој не го сторил тоа.
Не е прецизирано чиј глас бил оној што го прашал другиот. Во моментот на полетување, копилотот го управувал авионот, а капетанот набљудувал.
