Урсула фон дер Лајен денес се соочува со гласање за доверба

Пратениците на Европската унија во четврток ќе гласаат за доверба на шефицата на моќната извршна власт на блокот, Урсула фон дер Лајен, додека унгарскиот премиер Виктор Орбан ги предводи повиците за нејзино разрешување.

Предлогот за недоверба, прв во Европскиот парламент по повеќе од една деценија, беше покренат против претседателот на Европската комисија од група пратеници од крајната десница. За да се усвои, потребно е двотретинско мнозинство, објави АП.

Фон дер Лајен би можела да биде принудена да поднесе оставка ако изгуби, но практично е загарантирана победата бидејќи повеќето политички групи во собранието сигнализираа дека ќе гласаат против предлогот.

Не се очекува таа да учествува на гласањето што се одржува во Стразбур, Франција.

Предлогот содржи мешавина од обвинувања против фон дер Лајен, вклучувајќи приватни пораки со директорот на производителот на вакцини против Ковид-19 „Фајзер“, злоупотреба на средствата од ЕУ и мешање во изборите во Германија и Романија. 

„Тоа ќе биде моментот на вистината: од една страна империјалната елита во Брисел, од друга страна патриотите и здравиот разум. Нема излез од ова, од суштинско значење е да се направи избор“, напиша Орбан на социјалните мрежи.

„Госпоѓо претседателе, суштината на лидерството е одговорноста. Време е да си одиме!“, додаде тој.

Комисијата на фон дер Лајен честопати се судираше со Орбан околу потезите на неговата националистичка влада за задушување на демократијата.

Комисијата го замрзна пристапот на Унгарија до милијарди евра од фондовите на ЕУ.