Новинар е убиен на секои четири дена во последните две години, се вели во најновиот извештај на Агенцијата за образование, култура и наука на Обединетите нации (УНЕСКО).
Извештајот е објавен во саботата, на денот кога се одбележува Меѓународниот ден за ставање крај на неказнивоста на злосторствата против новинарите.
Од 162 убиства на новинари во 2022 и 2023 година потврдени од организацијата со седиште во Париз, повеќе од половина се извршени во држава погодена од вооружени конфликти.
Според извештајот, многу медиумски професионалци починале во нивните родни места.
Оние кои загинале во земји без конфликт биле убиени поради фокусирање на организираниот криминал и корупција или известување за протести, според извештајот, кој се објавува на секои две години и ја анализира безбедноста на новинарите ширум светот.
Во извештајот се наведува дека 162 проверени убиства на новинари во 2022-23 година претставуваат
„Зголемување од 38 отсто во однос на претходниот период, кога УНЕСКО забележа 117 случаи на убиства. Овој период претставува и најголем број убиства од периодот 2016-2017 година“.
„Овие злосторства не можат да останат неказнети“, рече директорката на УНЕСКО Одри Азулај во изјавата.
Најголем број убиени новинари во 2022 година има Мексико, со 19 случаи, додека во 2023 година, најголем број убиени новинари, 24, е забележан на палестинските територии, соопшти УНЕСКО.
Според извештајот, Латинска Америка и Карибите, како и арапските земји се региони со најголем број убиени новинари.
Според наодите од извештајот, никој не е повикан на одговорност за повеќето убиства.
УНЕСКО соопшти дека глобалната стапка на неказнивост во 2024 година достигна 85 отсто, што е мало намалување во споредба со 89 отсто во 2018 година и 95 отсто во 2012 година./ REL
