Стапката на ефикасност на вакцината Оксфорд паѓа на 70 проценти

Вакцината против болеста Ковид-19, развиена од компанијата „АстраЗенека“ во соработка со Универзитетот во Оксфорд, покажа просечна ефикасност од 70.4 отсто.

Најновите податоци ги објави Оксфорд, повикувајќи се на студија за клинички испитувања. Во претходните студии, објавени во списанието Lancet, кандидатската вакцина против коронавирус била 62 проценти ефикасна кај волонтери на кои им била вбризгана целосната доза и до околу 90 проценти кај волонтери на кои прво им била инјектирана половина доза, за потоа да им дадат целосна доза.

Извршниот директор на „АстраЗенекас“, Паскал Сориот, изјави дека компанијата за производство на лекови почнала да доставува податоци до регулаторните органи ширум светот, со цел што поскоро да добие одобрение за започнување со вакцинација.

Компанијата веќе ги подготви своите синџири за снабдување за да испорача стотици милиони дози.