-
Превод: Флутура Гаши-Мехмети
- 5 февруари 2026 14:00 часот
- Споделете на:
Украина и Русија го завршија вториот ден од разговорите во Абу Даби, посредувани од САД, во четврток, со цел да се стави крај на најразорниот конфликт во Европа по Втората светска војна, но се согласија само на размена на затвореници, прва од ваков вид во последните пет месеци.
Специјалниот претставник на американскиот претседател Доналд Трамп, Стив Виткоф, изјави дека делегациите од САД, Украина и Русија се согласиле да разменат 314 воени затвореници.
Поддржете го ВРЕМЕЗачувај ја вистината.
Професионалното новинарство е во јавен интерес. Вашата поддршка му помага да остане независно и кредибилно. Придонесете и вие. 1 евро прави разлика.
Писмо до читателот — Зошто бараме ваша поддршка Придонесете„Иако останува уште многу работа да се направи, ваквите чекори покажуваат дека континуираниот дипломатски ангажман дава конкретни резултати и ги унапредува напорите за завршување на војната во Украина“, рече Виткоф во објава на платформата X, опишувајќи ги мировните преговори како „детални и продуктивни“.
И Русија и Украина изјавија дека разговорите досега биле позитивни. Украински функционер изјави дека разговорите сега се завршени.
Доцна во среда, главниот преговарач на Украина, Рустем Умеров, го опиша првиот ден од разговорите како „значаен и продуктивен, фокусиран на конкретни чекори и практични решенија“. Во четврток, рускиот претставник Кирил Дмитриев рече дека има напредок и позитивно движење напред. Тој додаде дека се работи активно на обновување на односите на Русија со САД, вклучително и во рамките на работната група САД-Русија за економијата.
„Подбужниците на војна од Европа, од Велика Британија, постојано се обидуваат да интервенираат во овој процес, постојано се мешаат. И колку повеќе такви обиди има, толку повеќе гледаме дека дефинитивно се постигнува напредок“, рече Дмитриев.
Русија ги обвини европските сојузници на Украина, вклучувајќи ја и Велика Британија, дека ја продолжуваат војната со поддршка на Киев. Во меѓувреме, последната размена на затвореници се случи во октомври 2025 година. Размените на затвореници беа единствените конкретни чекори кон мир што произлегоа од претходните рунди разговори меѓу Украина и Русија, одржани во Турција минатата година.
Стотици илјади војници од двете страни се убиени, ранети или исчезнати во текот на речиси четиригодишната војна.
Украинскиот претседател Володимир Зеленски во средата изјави дека околу 55.000 украински војници биле убиени на бојното поле, но не даде детали за бројот на ранети или исчезнати.
Центарот за стратешки и меѓународни студии (CSIS), тинк-тенкот со седиште во Вашингтон, соопшти дека Русија претрпела речиси 1.2 милиони жртви за време на војната. Москва го отфрли извештајот како несигурен.