Турција уапси 37 лица поради објави на социјалните мрежи за апсењето на Имамоглу

Турција уапси 37 лица под сомнение дека направиле „провокативни објави кои поттикнуваат криминал и омраза“ во врска со притворањето на градоначалникот на Истанбул Екрем Имамоглу, објави во четвртокот министерот за внатрешни работи Али Јерликаја.

Турција во средата го уапси Имамоглу, главниот ривал на претседателот Реџеп Таип Ердоган, под обвиненија, вклучително и корупција и помагање на терористичка група, потег што главната опозициска партија го критикуваше како „обид за државен удар против идниот претседател“, пишува Ројтерс.

Турските власти идентификуваа 261 сметка на социјалните мрежи, вклучително и 62 со седиште во странство, за „провокативни објави“ по притворањето на Имамоглу, објави Јерликаја во Х.

Министерот рече дека 18.6 милиони објави биле споделени на X во врска со Имамоглу за помалку од 24 часа по неговиот притвор. 

Турција, исто така, заплени градежна компанија во косопственост на Имамоглу, објави истанбулскиот главен јавен обвинител.  

Во соопштението доцна во средата, обвинителството рече дека контролата на компанијата ја презел судот, врз основа на извештаите од истрагата за финансиски криминал.

Апсењето на Имамоглу дојде само неколку дена пред главната опозициска партија, Републиканската народна партија, да одржи внатрешни избори, на кои се очекуваше тој да биде прогласен за претседателски кандидат.

Исто така, апсењето дојде само еден ден откако Универзитетот во Истанбул му ја укина универзитетската диплома. 

Без универзитетска диплома, Имамоглу, од главната опозициска партија ЦХП, ќе биде дисквалификуван да се кандидира за претседател.

ПРОЧИТАЈТЕ ИСТО: